Wivenhoe-Parko (pikturo)

De Wikipedio
Salti al navigilo Salti al serĉilo
Wivenhoe-Parko

Wivenhoe-Parko esas pikturo di angla peizajo-parko, la domeno di la Rebow-familio, dal angla romantika piktisto John Constable (1776–1837).

John Constable naskis en la komtio Suffolk, e konocesas precipue pro lua peizajo-pikturi, aparte la peizaji di la ruro ube il pasis sua puereso.  Lua pikturi nun egardesas inter le maxim populara e valoroza en britana arto.

La National Gallery of Art en Washington DC konservas ica pikturo kom un ek sua maxim vidinda verki:

"Plezanta sento di tranquileso e harmonio permeas ica peizajo di quaze fotografiala klareso.  La granda arei de brilanta sunlumo e koldeta ombro, la nerekta lineo dil fenco, e la bela equilibro de arbori, prato, e rivero montras la kreiva sintezo dal artisto di la reala situo."

La pikturo komisesis dal proprietanto di Wivenhoe-Parko, Mayoro-General Francis Slater-Rebow, bona amiko dil patro dil artisto, Golding Constable.  Wivenhoe-Parko esas 81 hektari de parklando en Essex, komprita da la Rebow-familio ante 1734.  Slater-Rebow komisis plura pikturi de Constable, inkluzanta portreto di lua filiino en 1812.  El anke aparas en ca pikturo, en asno-chareto sinistre.  Per ica pikturo, finita en septembro 1816, la artisto ganis sat multa pekunio por mariajesar a sua amoranto, Mary Bicknell en oktobro 1816.