Wolverhampton Wanderers Football Club

De Wikipedio
Salti al navigilo Irez a serchilo
Molineux-Stadio, la hemo di Wolves

Wolverhampton Wanderers Football Club, ofte konocata kom Wolves ("volfi"), esas profesionala futbalo-klubo en Wolverhampton, West-Mezalandi, Anglia.

Formacita kom St Luke's F.C. en 1877, li ludas che Molineux-Stadio depos 1889 e nun konkursas en la Premier League, la maxim alta nivelo di angla futbalo, pos ganir la EFL-Championeso di 2017-18.

Wolves esis un ek la fondinta membri dil Angla Futbalo-Ligo en 1888.  La klubo pasis 33 yari en la supra ligo de 1932 til 1965, lia maxim longa kontinua periodo ye ta nivelo.  Dum la 1950a yari, li esis Ligo-championi trifoye (1953-54, 1957-58 e 1958-59), kun jeristo Stan Cullis.  Wolves anke finis duesme en la Ligo kinfoye, maxim recente en 1959-60.

Wolves ganis la FA-Kupo quarfoye, maxim recente en 1960, e finis duesme quarfoye.  La klubo anke ganis la Football League-Kupo dufoye, en 1974 e 1980.

En 1953, Wolves esis un ek la unesma klubi en Anglia qui instalis stadio-lumizilegi, e partoprenis che-televiziona "floodlit friendlies" kontre stranjera klubi inter 1953 e 1956, ante la kreeso dil Europana Kupo en 1955.  Wolves atingis la quarimo-finali dil Europana Kupo 1959-60 e la mi-finali dil Europana Kupo de Kupo-ganinti 1960-61, e finis duesme dop Tottenham Hotspur en la finalo dil unesma UEFA-Kupo en 1972.

La tradicionala ludo-vestaro di Wolves konsistas ek orea kamizi e nigra kurta-pantaloni, plus la klub-insigno de un o plura volfi.  Wolves havas longe-existanta rivalesi kun altra klubi en la West-Mezalandi, precipue kun West Bromwich Albion, kontre qua li konkursas la ludo "Black Country Derby".