Hoplito

De Wikipedio
Wikipedio
Wikipedio
Wikivortaro explikas
ca rubriko
en altra lingui: Hoplito
Desegnuro di hoplito Grekian, apogante sur sua lanco e portante shildo.

Hoplito o hoplites (Greke: ὁπλίτης) esis antiqua Grekiana infantriano, qua precipue kombatis per granda lanco e di qua armi esis tre pezoza. L'equipuro di hoplito anke inkluzis granda ronda shildo nomata ὅπλον, helmo, kuraso ed ofte kurta espado. Onu precipue uzis ica tipo del 8ma til la 4ma yarcento a.K. Hopliti esis viri e libera Greka civitani, qui pagis por sua propra equipi e precipue apartenis al mezoklaso. Existis do multa diferi inter l'equipuri dil hopliti dil sama urbo, quankam pose kelk aspekti plu normizesis. Ili bataliis en formaco, qua nomesas falango. Falangi di hopliti formacis la spino di Grekiana armei, qui anke kontenis altra tipi di soldati, quale peltasti.

Pro la expando di Greka kolonii kelka altra kulturi anke adoptis la taktiki dil hopliti e Grekiana falangi. Ambe l'Etruski e la frua Romani uzis hoplitala militado segun la stilo dil Greki.

La hopliti divenis min importanta pos la developo dil taktiki dil falango Makedonian, qua uzis plu longa lanci e plu mikra shildi por atakdisto plu longa. Tamen, multa urbi ankore uzis klasika hopliti e plu nova versioni di ica tradicionala soldato.