Shiva

De Wikipedio
Por l'Indiana muzikisto, videz Ravi Shankar (la vorto Shankar ridirektas hike).
Pashupati-siglilo. La centrala figuro forsan esas Shiva. Sinistre e dextre esas diversa animali.

Shiva (Sanskrite: शिव, "Śiva", qua signifikas "la bon-auspica") esas la nomo di la triesma granda deo del Hinduismo. Lu guvernas la mondo kun l'altra dei Brahma e Vishnu. Il esas la chefdeo dil Shaivismo (anke Shivaismo), esante la destruktanto di malo e la kontravencanto pri normi. Lua spozino o spozini esas Sati e Parvati; Parvati esas la transmigrita Sati.

Il anke konocesas per mult altra nomi, exemple Viswanathan (sioro dil universo), Mahadev o Mahadeva, Mahesha, Maheshvara, Shankara, Natraj, Shambhu, Rudra, Hara, Trilochana, Devendra (chefo di la dei), ed altri.

Shiva esas deo kun blua pelo quale multa devas, tri okuli, quar brakii e glutinita hari. Ilu portas tridento nomata trishula e havis la krecento sur sua kapo. Lu kavalkas sur la bovulo Nandi ed ofte portas cindro e serpento. On anke adoras Shiva kom lingam, rituala kolono.

La deo Shiva nur tarde reprezentesas per ca nomo en la Hindua tradiciono. Il forsan unesme aparis sur siglilo de la civilizuro del Indus-valo, sur qua figuro inter animali montresas, ma ico esas tre kontroversala hipotezo. Ca siglilo nomesas Pashupati-siglilo. En la Vedas il aparas kom Rudra, qua ankore ne esis tre importanta deo di la tempesti e vetero. Nur dum la tarda 1ma yarmilo aK Shiva divenis importanta deo, fine portanta la nomo Shiva.