Caserta

De Wikipedio
Caserta
Aeral imajo pri Caserta.
Lando: Italia
Regiono: Kampania
Informo:
Latitudo: 41°04'N
Longitudo: 14°20'E
Altitudo: 68 m
Surfaco: 54,07 km²
Habitanti: 74 450 (2019)
Denseso di habitantaro: 1376,92 hab./km²
Horala zono: UTC+1
(UTC +2 dum la somero)
Urbestro: Carlo Marino (PD)
• Caserta
Oficala retosituo:
www.comune.caserta.it

Caserta (pronuncez Kaserta) esas chef-urbo di la samnoma provinco en la regiono Kampania, Italia. Segun statistiki dil yaro 2019, ol havis 74 450 habitanti. Lua tota surfaco esas 54,07 km². Ol distas 35 km de Napoli.

Rejeyo[redaktar | redaktar fonto]

Un del edifici maxim anciena, certe la maxim importanta e grandioza, esas la famoza rejeyo. Olu konstruktigesis dal arkitekto Luigi Vanvitelli pro komisiono da Carlo la 7ma di Borbone, di qua ol esis la rezideyo somerala. Ol esas palaco majestoza kun grandnombra chambri larja e spacoza e kun grandega parko.

On acensas a la chambri rejala per longa eskalero repartisita du-rampe: l'infra duimo esas centrala e la supra esas duopla, nome ol konstitucesas da du gradari laterala. En la suprajo dil unesma rampo esas du leoni skultita ek marmoro, qui de la du lateri di la rampo „regardas“ l'acensanti. En un del unesma chambri onu povas vidar horlojo kun indexi, qua havas 24 kloki. La chambri esas kontigua una al altra, direte konektita per pordi, qui esas omna aliniita inter oli, formacante longa tunelo. En la fundo di la tunelo tandem on trovas l'emocigiva tronchambro, riche ornita per luxoza tapisi ek reda veluro ed ube on povas admirar evidente l’impozanta trono rejala. La parko, tre impresiva, esas cheflaboruro dil arkitekturo: esas belega kaskadi gradatra, ampla alei e bosketo kun densa plantaro, en qua esas imersita granda fishuyo kun insuleto centrala, e jolia „castelluccia“ (pron. kastelucha), originala kasteleto miniaturatra. Ne mankas skulturi, reprezentanta inter lo altra, anke kreuri mitologiala, quale la „centauro“ (pron. chentauro), qua esas duime homo e duime kavalo. La parko acensas sempre plu multe dum ke on iras adavane, ed en la zono supra onu povas enirar la „Angla gardeno“, qua esas aparta gardeno aranjita angla-maniere, kun pitoreska lageto ravisiva e flavatra, qua havas interne mikra insulo plantoza, same kam la fishuyo supere menconita. Omnadie, plu multe sundie, centi de turisti venas a Caserta de irga loki, por vizitar ica belega ed interesiva konstrukturo.

Ica pagino uzas kontenajo de la revuo Ido-Saluto! numero 2/2008, publikigita sub la Creative Commons Licence 2.0.