Ciencala komunitato

Ciencala komunitato indikas, en senco sat larja, l'ensemblo di ciencisti ed altra distingita personi di quin lia verki havas por temo cienci e/o inquestado segun ciencala metodi. Kelkafoye ta frazo cirkumskribesas a partikulara ciencala domeno, exemple la komunitato di astrofizikisti por l'astrofiziko. La sociologio di la cienci studias ta komunitati, quale li agas, e quale li insertesas en la socio.

Segun William A. Kornfeld e Carl Hewitt, la "ciencala komunitati" posibligas l'expozo di idei e la debato inter ciencisti qui verkas en la sama temo, od en simila o diferanta temi. Por ica du autori, l'existo di "ciencala komunitati" esas esencala por la developo di cienci.

Tamen, la frazo "ciencala komunitato" povas judikesar kom obsoleta, pro posibligar ula ciencisto referar lua propra kolegi por legitimigar sua konkluzi pri sua propra inquesto. On anke ne povas egardar la frazo "ciencala komunitato" tro literale; fakte la sequanta problemi eventas:

• ciencala komunitato ne esas ula komunitato institucita, pro ke ol ne havas legala reprezentero, o viceparolanto oficala;
• ciencala komunitato ne esas grupo di personi qui povas rikonocesar juste, e ne povesas "etiketizar" quin esas lia membri, e quin ne esas: videz, exemple la problemo pri pseudocienci;
• ciencala komunitato ne esas uniono di personi. En la sama ciencala fako, inkluzite pri exakta cienci, multa diferanta opinioni povas kunexistar.

L'exakta signifiko di la frazo ciencala komunitato esas tam konfuza kam la de la frazo internaciona komunitato.