Inquiziciono
Inquiziciono esas tribunalo del eklezio katolika, instalita por serchar e persequar personi akuzita pri herezio, to esas, irga kredajo deskonkordanta kun la kustumi establisita dal eklezio. Multafoye, hereziani kondamnesis a mortopuniso.
La Inquiziciono kreesis en Francia dum la Mezepoko, plu exakte en 1184, por kombatar Katarianisti, anke nomizita Albigensi. En 1249 ol instalesis en la rejio Aragon, esinte l'unesma statala Inquiziciono. Dum Modern-epoko, kun l'uniono inter Aragon e Kastilia, ol extensesis a tota teritorio di Hispania e pose a Hispana Amerika. En Portugal la Inquiziciono adoptesis en 1536, e duris til 1821, kande ol abolisesis. En Hispania ol abolisesis erste en 1836. En Italia (Papala Stati) ol establisesis en 1542, ed un ek lua viktimi esis l'astronomo e filozofo Giordano Bruno, brulita en rogo ye la 17ma di februaro 1600.
Un ek la metodi multe uzita por obtenar konfesi pri herezio esis tormento, exemple pozar l'akuzito en sidilo konteninta fera pinti por vundar la korpo, flogar lu, edc.
Ultre personi qui deskonkordis kun la kredaji establisita da Katolik-Eklezio, la Inquiziciono anke persequis homeosexuali, prostitucini, Judaisti e/o altra personi akuzita pri esar "falsa kristani", personi akuzita pri mantenar sexuala relati kun bestii, personi akuzita pri esar sorcisti e mem animali, exemple nigra kati.
