Islamana Bulgari

De Wikipedio
Jump to navigation Jump to search

L'Islamana Bulgari (bulg. българи-мохамедани /balgari-mokhamedani/) esas Bulgari dil religio Islamana. Li esas decendanti di Kristana Bulgari, qui konvertesis ad Islamo dum la periodo de 16ma til 18ma yarcenti - l' Otomana okupado di Bulgaria.

Islamana Bulgari vivas precipue en la Rodopi - la provinco di Smolian, suda parti dil provinci di Pazardjik e Kardjali ed esta parto dil provinco di Blagoevgrad en sud-Bulgaria, same quale en la prefektii di Xanthi e Rodopi en nord-est-Grekia. Li anke vivas en grupo di vilaji en la provinco di Lovech en nord-Bulgaria.

Li anke nomesas Pomaki, ma to esas pejorativega en la linguo Bulgara e rankorata da majoritato dil Islamana Bulgari, specale le ne-praktikanta. La nomo adoptata e uzata vicee esas Islamana Bulgari.

Bulgaria[redaktar | redaktar fonto]

Islamana Bulgari ne reprezentas socio homogena. Ma le vivanta en Pirin e west-Rodopi (en la provinci di Pazardjik e Blagoevgrad) esas religiemega e li konservis la sistemo Islamana di nomizado, kustumi e vestizado. Dum ke un triimo di li identifikis su kom Bulgari en la kontado dil habitantaro en la yari 1992 e 2001, un triono di li en west-Rodopi selektis Turka etnikeso, qunkam lia linguo matral anke esas la Bulgara.

Pomaki en la Rodopi parolas multa Bulgara dialekti arkaika. Sub l' influo di skolal edukado, la dialekti preske plene unionesis kun la norma Bulgara inter Islamana Bulgari vivanta en Bulgaria.

Grekia[redaktar | redaktar fonto]

Pro ke Grekia tendencis ad egardar sua Islamana minoritato kom parolanta nur Turke e do permisis edukado nur en la Turka, la Islamana Bulgari en Grekia divenis multe bi-lingua e la linguo matral di kelka di li nun esas la Turka. La linguo parolata da ti, qui konservis la dialekto kom sua linguo matral, influesis multe dal Turka e dal Greka ed ol diferas del norma Bulgara.

L' Islamana Bulgari en Grekia multe Turkigesis. Depos la 1990ma yari, Grekia facis probi experimental promocar aparta Pomaka identeso, parte pro la Turkigado avanirinta dil ne-Turka membri di sua Islamana minoritato (Islamana Bulgari e Cigani) e parte pro timo dil procento kreskanta di Islamani en Trakia dum la recenta yardeki. Dicionario Greka-Pomaka publikigesis ed Islamana Bulgari ofte deskriptesas da Grekiana autoritatozi kom amalgamo di Bulgari, Greki ed Turki o Islamana Greki Slav-parolanta.

Turkia[redaktar | redaktar fonto]

L' Islamani en Turkia de Bulgaria ne relatas al Turki, qua migris a Bulgaria en la 14ma yarcento. Li esas cirkum 200 000. Li ne egardesas dal Turkiana guvernamento kom etnika minoritato, ma kom Turka decendanti di Kumani ed altra tribui anciena Turkika. Kelka di li havas su-koncio Turka o Pomaka distingiva.