Kinderdijk
Kinderdijk esas vilajo en Nederlando, en la municipo Molenwaard, en la provinco Sud-Holando, cirkume 15 km este de Rotterdam.
Kinderdijk situesas en polder en la Alblasserwaard ye la kunflueyo di la riveri Lek e Noord. Por drenar la polder, sistemo de 19 vento-muelili konstruktesis c. 1740. Ica muelilaro esas la maxim granda grupo de anciena vento-muelili en Nederlando.
La vento-muelili di Kinderdijk esas un ek la maxim bone konocata turisteyi en Nederlando. Li esas Situo di Mondo-Heredajo di UNESCO depos 1997.
Nomo
[redaktar | redaktar fonto]La nomo Kinderdijk signifikas en la nederlandana "Pueri-digo". Dum la Santa-Elisabeth-inundo en 1421, la Grote Hollandse Waard inundesis, ma la polder Alblasserwaard ne. On dicas ke kande la tempesto kalmeskis, ulu iris a la digo inter ta du arei por vidar quo esis salvebla. Distante il vidis ligna bersilo sur la aquo. Dum ke ol proximeskis, movo esis detektebla. Kato videsis en la bersilo, qua saltis hike ed ibe por preventar ke aquo enirez ol.
Kande la bersilo esis sat proxim la digo por ke ulu povez prenar ol, lu vidis ke bebeo dormis quiete en ol, tote sika. La kato equilibrigis la bersilo. Ica folkloro-rakonto e legendo editesis kom "The Cat and the Cradle" en la angla. Kinderdijk pumpas aquo por preventar inundo.
Historio
[redaktar | redaktar fonto]
En Alblasserwaard, problemi pro aquo divenis sempre plu frequa en la 13ma yarcento. Kanalegi, nomizita "weteringen", exkavesis por forigar ecesala aquo en le polder. Tamen, la drenita sulo duris sinkar, dum ke la nivelo dil rivero plualteskis pro sablo-depozaji. Pos kelka yarcenti, on bezonis plusa maniero konservar le polder sika.
On decidis konstruktar serio de vento-muelili, kun limitizita kapableso "pontizar" diferi di aquo-niveli, ma kapabla pumpar aquo aden rezervuyo a meza nivelo inter la sulo en la polder e la rivero; la rezervuyo esus pumpebla aden la rivero da altra vento-muelili kande la rivero-nivelo esis sat basa; la rivero-nivelo varias e sezonale e mareale. Malgre ke ula vento-muelili ankore uzesas, la aquo-jerado precipue provizesas da du pumpo-stacioni proxim un ek la enireyi di la muelilo-situo.
Vento-muelili
[redaktar | redaktar fonto]La muelili di Kinderdijk esas depos 1997 en la Situo di Mondo-Heredajo di UNESCO. La 19 vento-muelili dividesas en serio de ok muelili an la Nederwaard (la ronda petra muelili), rango de ok muelili an la Overwaard, plus wipmolen (piramidala muelilo); la Blokweerse molen qua servas la polder Blokweer, ed en la polder Nieuw-Lekkerland du muelili.
Videz anke: Zaanse Schans
