Kur-bendo

De Wikipedio
Viro kuranta sur kur-bendo.

Kur-bendo o rul-bendo esas mashino por korpale exercar su pazante, trotante o kurante dum samatempe restar sur un plaso. Kur-bendi esas kustumal aparato en gimnastikeyi od exerceyi, ma on povas havar olu heme.

Kur-bendo konsistas ek platformo, sur qua movas transport-bendo (rul-bendo) di qua la rapideso povas adaptesar segun bezono. La bendo movas kun konstanta rapideso e l'uzanto pazas o kuras en la kontrea direciono sama-rapide, tale restante sur un plaso. La bendo movesas per elektrala motoro od ol esas provizita de flug-roto. En elektro-movata bendo la rapideso povas esar adaptata per adaptilo di la motoro. En la plu simpla tipo, qua havas flug-roto, la rapideso povas esar adaptata segun paz-ritmo di la marchanto, di qua la pazado anke movas la bendo.

Kur-bendi povas havar diversa mezurili por indikar la duro dil exercado, la rapideso di kurado e l'energio-konsumo. Anke korpala mezurili (unesma-range la kordio-pulso) povas ligesar a la marchanto por aquirar preciza datumaro pri intenseso dil exerco e por tale plu-efikivigar ol.