Melbourne
| Melbourne | ||
 | ||
| Kelk imaji pri Melbourne. | ||
| Lando: |  Australia | |
| Stato: | Victoria | |
Informo: | ||
| Fondita ye: | 30ma di agosto 1835 | |
| Latitudo: | 37°48'49" S | |
| Longitudo: | 144°57'47" E | |
| Altitudo: | 31 m | |
| Surfaco: | 9 992,5[1] km² | |
| Habitanti: | 5 031 195[2] (2021) | |
| Denseso di habitantaro: | 503,5 hab./km² | |
| Disto de Canberra: | 659 km | |
| Horala zono: | UTC+10 (UTC+11 dum somero) | |
Mapo: | ||
 | ||
 • Melbourne | ||
Melbourne (pron. Melborn) esas la 2ma maxim populoza urbo di Australia e la chef-urbo e maxim populoza dil stato Victoria. Segun la demografiala kontado di 2022, ol havis 5 031 195 habitanti[2]. Lua tota surfaco esas 9 992,5 km²[1].
L'areo habitabas da aborijeni de plu kam 40 mil yari ante nun. Ol divenis kolonio Britaniana en 1837, e lua nomo homajas lora chef-ministro Britaniana, William Lamb, 2ma viskomto Melbourne. En 1956, l'urbo gastigis l'Olimpiala Ludi unesmafoye en Australia.
Nun, l'urbo esas kulturale diversa, e plua kam 40% de lua habitantaro naskis exterlande. Ol esas importanta financala centro en la regiono Azia-Pacifiko. Lua arkitekturo mixas elementi del epoko di Rejino Victoria kun moderna edifici. En Melbourne kreesis ludo konocata kom "Australiana futbalo", e developesis tale nomizita piktala stilo konocata kom Australiana Impresionismo. Cinemo anke developesis multe en la urbo. Nun, Melbourne konocesas por sua koloroza arto en stradi, muzikala spektakli e teatraji.
Lua aeroportuo esas la 2ma maxim granda de Australia, e lua portuo esas la maxim uzata de la lando.
Geografio
[redaktar | redaktar fonto]
Melbourne jacas sude de Australia, cirkondata da lavaoflui de Quaternaro weste, argiloza suli de Siluriano este, ed arenoza suli formacita dum Holoceno alonge Port Phillip. La centro dil urbo esas plana, kun kolinoza arei kovrata da arbusti norde. Lua mezavalora altitudo esas 31 metri.
La klimato di Melbourne povas klasifikesar kom moderema kun influi del oceano (Cfb segun la klimatala klasifikuro da Köppen) o humida subtropikala, kun varma someri e milda vintri. La mezavalora temperaturo en julio (vintro) esas 9,6°C, kontre ke la mezavalora temperaturo en januaro e februaro (somero) esas 20,6°C. Pro sua proximeso kun l'oceano e kun varma erei doplanda, lua klimato esas variema, e la granda vario di temperaturi diala povas efektigar severa tempesti dum printempo e vintro.
La mezavalora yarala pluvo-quanto dil urbo esas 515,5 mm. Ne existas monato komplete sika, tamen la pluvozeso ne esas kontinua od intensa, quale exemple en Sydney o Brisbane. La mezavalora atmosferala humideso esas plu alta en junio e julio (65% e 63%, rispektive).
Referi
[redaktar | redaktar fonto]
- 1 2 3218.0 Regional Australia, 2015–16: Population Estimates by Statistical Area Level 2(ASGS 2016), 2006 to 2016 - Dato di publikigo: 28ma di julio 2017. URL vidita ye 26ma di oktobro 2017.
- 1 2 Regional Population, 2022 - Publikigita da Australian Bureau of Statistics. Dato di publikigo: 20ma di aprilo 2023. URL vidita ye 16ma di julio 2023.