New Horizons

De Wikipedio
New Horizons renkontras Karono, satelito di Plutono

New Horizons ("Nova Horizonti") esas kosmosondilo di Usa. Olua precipua skopo esis explorar la nana planeto Plutono ed olua sateliti.

Voyajo[redaktar | redaktar fonto]

Ol lansesis ye 19 di januaro 2006, ed atingis eskapo-rapideso por livar la sunala sistemo; ol esis la maxim rapida objekto lansita de Tero. Ye 28 di februaro 2007 ol atingis maxim proximeso, 2,3 milion km, di Jupitero.

Ol hivernis dum la cetera voyajo vers Plutono, til decembro 2014.

Plutono[redaktar | redaktar fonto]

En januaro 2015 komencis la fazo di proximesko a Plutono; ye 14 di julio di ta yaro ol preterpasis la planeto ye disto 12500 km, ed olua satelito Karono ye disto 28800 km; ol anke fotografis la mikra sateliti Nix, Hydra, Kerberos e Styx. Dum plura monati, til 25 di oktobro 2016, ol transmisis a Tero l'informeso ganita.

Arrokoth[redaktar | redaktar fonto]

Arrokoth, fotografita da New Horizons 19 minuti ante maxim proximeso

New Horizons pose voyajis vers la Kuiper-zono. Ye 1 januaro 2019 ol preterpasis Arrokoth (nomizita "Ultima Thule" til novembro 2019). Ca objekto, deskovrita en junio 2014, konsistas ek du fragmenti, longesi 21 km e 15 km.

New Horizons havas suficanta povo por funcionar til la 2030-yardeko, e povos explorar plusa objekti di la Kuiper-zono se tala objekti esos trovata proxim olua trajektorio.