Panforte

Panforte esas tradicionala italiana desero quo kontenas frukti e nuci, e similesas fruktokuko o Lebkuchen. Olua origino esas forsan la 13ma yarcento en Siena, en la regiono Toscana, Italia. Dokumenti de 1205 montras ke ibe on pagis per panforte la monakuli e monakini di lokala monakeyo, imposto o dismo pagenda ye la sepesma di februaro ta-yare.

Literale, panforte signifikas "forta pano", quo referas la spicoza saporo. La originala nomo di panforte esis "panpepato" (piprizita pano), pro la forta pipro uzita en la kuko.

La procedo di facar panforte esas sat simpla. On dissolvas sukro en mielo e mixas diversa nuci, frukti e spici kun farino. La tota mixuro bakesas en neprofunda kasrolo. La finita kuko esas polvizata per sukro. Komercale produktita panforte ofte havas bendo de rizo-papero cirkum la bordo.

Nunadie esas multa butiki en Italia qui produktas panforte, singla recepto esas jaluze gardata interpreto dil originala recepto e distinte pakigata. Ofte konieto servesas kun kafeo o desero-vino pos repasto, ma uli juas ol kun sua kafeo ye dejuneto.

En Siena - egardata da multa, mem la maxim multa habitanti di ta urbo, kom la panforte-chefurbo di Italia - on kelkafoye dicas ke panforte devas kontenar dek-e-sep diferanta ingredienti, nam dek-e-sep esas la nombro de contrade (distrikti) interne dil urbo-muri.