Potosí
| Potosí | ||
 | ||
| Potosí kun lua katedralo. | ||
 |
.svg) | |
| Standardo | Blazono | |
| Lando: |  Bolivia | |
| Departmento: | Potosí | |
Informo: | ||
| Latitudo: | 19°35′21″S | |
| Longitudo: | 65°45′12″W | |
| Altitudo: | 4067 m | |
| Surfaco: | 118,2 km² | |
| Habitanti: | 267 907 (2021) | |
| Disto de La Paz: | 537,2[1] km | |
| Horala zono: | UTC-4 | |
| Urbestro: | Jhonny Llally (MPC)[2] | |
Mapo: | ||
 | ||
Oficala retosituo: | ||
| http://www.potosy.com.bo/ | ||
Potosí esas chef-urbo di samnoma departmento en Bolivia. Segun statistiki de 2021, ol havis 267 907 habitanti. Lua tota surfaco (urbo + municipo) esas 118,2 km².
L'urbo jacas a 4090 metri di altitudo, ed esas un di la maxim alta urbi en la mondo. Dum yarcenti, Hispani explotis arjento en lua vicineso, e la monetifeyo koloniala jacis ibe. L'arjento transportesis per muli e lamai til la litoro di Pacifiko, de ube ol transportesis per navi a Panama-urbo, ed itere per muli til la litoro di Atlantiko e de ibe a Hispania.
Nun, l'urbo duras esar importanta centro por minado. Granda parto di lua kolonial edifici prezervesis, e lua historiala centro nun esas Mondala Patrimonio di la Homaro, segun UNESKO. La kulmino di la monto Cerro Rico de Potosí jacas 4 824 metri adsur marala nivelo.
Geografio
[redaktar | redaktar fonto]
La reliefo di Potosí esas kolinoza en lua historiala centro, e montoza en lua vicineso. Lua mezavalora altitudo esas 4067 metri, e lua maxim alta punto esas monto Cerro Rico de Potosí, kun 4824 metri super la marala nivelo. Cerro Rico de Potosí havas la maxim granda jaceyo di arjento de la mondo, e minado komencis dum la 16ma yarcento. En 1996 extraktesis 60 mil tuni de arjento de ol.
La klimato di Potosí esas miarida (Bsh) o subpolala oceanala, kun sika vintro (Cwc segun la klimatala klasifikuro da Köppen). La mezavalora diala temperaturo en decembro (somero) esas 10°C, kontre ke la mezavalora diala temperaturo en julio (vintro) esas 5°C. Dum vintri, noktala temperaturo povas falar til -4°C. En rara okazioni nivas sur la urbo.
La mezavalora yarala pluvo-quanto dil urbo esas 397 mm. La pluvoza sezono iras de decembro til marto. La maxim pluvoza monato esas januaro: mezavalore 92 mm. La mezavalora pluvo-quanto de mayo til oktobro esas infre 3 mm omnamonate. Junio e julio esas preske komplete sika. L'atmosferala humideso esas 25% dum vintro, e 63% dum pluvoza sezono.
Turismo
[redaktar | redaktar fonto]
Potosí deklaresis Mondala Patrimonio di la Homaro da UNESKO en 1987, diveninta l'unesma loko en Bolivia agnoskita quale to. En junio 2014, UNESKO inkluzis l'urbo en listo pri patrimonii minacata, nam minado sen kontrolo minacas la urbo.
L'urbo havas richa patrimonio arkitekturala en sua stradi centrala, kun multa konstrukturi de kolonial epoko. Exempli esas sua katedralo, konstruktita segun stilo gotika, lua antiqua monetifeyo (Casa de la Moneda) konstruktita de 1757 til 1773, e l'edifico dil Autonoma Universitato Tomás Frías.
Altra notora edifico, nomizita Torre de la Compañía konstruktesis kom kuvento da jezuiti, inter 1700 e 1707. Ol jacas proxim monto Cerro Rico e l'antiqua monetifeyo.
La kuvento di Santa Franciskus, fondita dal monako Gaspar de Valverde en 1547, esas la maxim anciena monakeyo di Bolivia. Ol rikonstruktesis ed augmentesis en 1726. En sua internajo existas importanta muzeo pri kolonial arto, nome religial objekti, kun ecelanta pikturi de tale nomizita "skolo di Potosí", exemple pikturo "Instalo di la Kruco", da Melchor Pérez de Holguín, e diversa verki da Juan de la Cruz Tapia, facita dum la 19ma yarcento.