Bolivia

De Wikipedio
Irez ad: pilotado, serchez
Bolivia
Estado Plurinacional de Bolivia
Bulivya Mamallaqta
Wuliwya Suyu
Flag of Bolivia.svg Coat of arms of Bolivia.svg
Flago di Bolivia Blazono di Bolivia
Nacionala himno:
Bolivianos, el hado principio
LocationBolivia.svg
Urbi:
Chefurbo: La Paz (sideyo dil guvernerio)
Sucre (konstitucala chef-urbo)
Precipua urbo: Santa Cruz de la Sierra
Lingui:
Oficala lingui: Hispana
Quechua, Aymara
Guvernerio:
Tipi: Republiko
· Prezidanto: Evo Morales
Surfaco: (28ma granda)
· Totala: 1 098 581 km²
· Aquo: 1,29 %
Habitanti: (83ma granda)
· Totala: 11 410 651[1] (2015)
· Denseso di habitantaro: 10,4 hab./km²
Pluse informi:
Valuto: Boliviano
Veho-latero: dextre
ISO: BO
BOL
068
Reto-domeno: .bo*
Precipua religio: katolikismo, 88,3%


Bolivia esas republiko qua jacas en Sud-Amerika. Lua nomo homajas Simón Bolívar, heroo di la movadi pri nedependo di la Hispana kolonii en Sud-Amerika.

Bolivia havas frontieri norde ed este kun Brazilia, sud-este kun Paraguay, sude kun Arjentinia, e weste kun Chili e Peru.

Bazala fakti pri Bolivia

Historio[redaktar | redaktar fonto]

La Puerta del Sol (la pordo di la suno), simbolo di la kulturo Tiwanaku o Tiahuanako.
 Precipua artiklo: Historio di Bolivia

Ja existis civilizeso en la regiono di Tiahuanako de la 4ma til la 10ma yarcento. Tamen, arkeologiisti poke savas pri ta civilizeso, ecepte ke lu kreis granda petro-konstrukturi kun imaji pri animali. Posible ta populo dekadis pos la 10ma yarcento. Cirkum la yaro 1200 inkai okupis la regiono e vicina monti. L'imperio Inka developis til 1535, kande Hispani destruktis ol[2].

Hispani establisis kolonii en la regiono dum la 16ma e la 17ma yarcenti. Pos deskovrir arjento en Potosí Hispania koncentris lua atenco en Bolivia, e nomizis la regiono Alto Perú. En 1559 la regiono divenis parto dil Vicerejio di Peru, kun chef-urbo en Sucre[2]. Dum koloniala periodo eventis multa indijena revolti sensucese, note de la fino dil 18ma yarcento til la komenco dil 19ma yarcento.

Bolivia divenis nedependanta de Hispania ye la 6ma di agosto 1825. Simón Bolívar helpis Antonio José de Sucre dum la nedependo-milito. Por ca motivo, la lando recevis la nomo Bolivia. En 1826 Antonio José de Sucre divenis l'unesma prezidanto di Bolivia.[2]

Dum la guvernerio de Andrés de Santa Cruz en 1836, Bolivia invadis Peru e formacis la Kunfederuro Bolivia-Peru. Kun la falio dil invado, la kunfederuro finis.

Inter 1879 e 1883 eventis la milito di Pacifiko: Bolivia e Peru luktis kontre Chili. Konseque, Bolivia perdis lua aceso al Oceano Pacifiko.

En 1903 per la kontrato di Petrópolis, Bolivia perdis la regiono Acre por Brazilia, kambie de indemno e de la konstrukto di la ferofoyo Madeira-Mamoré. Dum l'unesma mondomilito Bolivia restis neutra. De 1932 til 1935 Bolivia militis kontre Paraguay en milito di Chaco. Konseque de la milito, Bolivia perdis granda parto di la regiono Chaco por Paraguay.

De 1935 til 1952 eventis diversa armeala revolti. En 1943 la lando deklaris milito kontre nacional-socialista Germania ma ne sendis soldati por kombatar en Europa. En 1945 Bolivia divenis membro di Unionita Nacioni[2].

CIA entrenis e furnisis pekunio a Boliviana militisti dum la yari 1960ma. Che Guevara mortigesis ye la 9ma di oktobro 1967 dal Boliviana militisti kun la helpo di CIA. En 1979 ed en 1981 eventis elekti kun akuzi di fraudi. Inter l'elekti eventis stato-stroki ed militistala guverni. Dum la guvernisteso dil militisti eventis violenti kontre la homala yuri, augmentis la vendo di drugi, e kreskis l'ekonomiala kaoso kun grand augumento dil inflaciono. Pos revolto dil armeo en 1981 e la duranta kaoso politikala ed ekonomiala, la generalo Gido Vildoso Calderón asumis la povo en 1982 e proklamis valida la rezulto dil elekti qui eventis en 1980. Do, Hernán Siles Suazo povis asumar la povo e guvernar til 1985. Ta yaro eventis anticipita elekti, e Víctor Paz Estenssoro asumis la povo por guvernar 4 yari, til 1989.

Politiko[redaktar | redaktar fonto]

Palaco dil Guvernerio, en La Paz.
Sideyo dil kongreso di Bolivia.

Bolivia esas prezidantala republiko. La prezidanto (nune Evo Morales) esas la chefo di stato e la chefo di guvernerio, qua elektesas dal populo por 5 yari. Ambe povas rielektesar unfoye sequante.

La Kongreso (Asamblea Legislativa Plurinacional) havas 2 chambri: Senato kun 27 membri, e Chambro di Deputati kun 130 membri. Nuna konstituco adoptesis la 7ma di februaro 2009.

Judiciala povo kompozesas dal Supra Judicieyo (konsistanta ek 7 membri qui elektesas dal Kongreso), dal departmentala tribunali e dal lokala judicieyi. Por konstitucala questioni existas la Konstitucala Tribunalo.

Bolivia havas 2 chef-urbi: la judiciala chef-urbo esas Sucre (ube jacas la Supra Judicieyo di lando), l'administrala chef-urbo esas La Paz.

Geografio[redaktar | redaktar fonto]

Satelital imajo di Bolivia.
Nevado Sajama (6.452 metri di altitudo).

Bolivia esas la 28ma maxim vasta lando de la mondo, e la 5ma maxim vasta de Sud-Amerika. La montaro Andi jacas adweste ed adsud-weste, an la frontiero kun Peru e Chili, e kovras 28% de la teritorio di Bolivia, kun altitudi qui superiras 3.000 metri super la marala nivelo. La plana regiono (Llanos) kovras 29% de Boliviana teritorio, de la bazo di Andi til la baseno dil fluvio Paraguay. Altra 30% kovresas per l'Equatorala Amazoniana foresto adnorde, an la nordala departmento Beni. Este e sud-weste jacas la plana regiono Chaco. La relevo di la lando varias multe: la minima altitudo esas 70 metri sur la marala nivelo en Chaco, dum ke la maxima altitudo esas 6 542 metri sur la marala nivelo en la monto Nevado Sajama, la maxim alta de Bolivia, che l'Andi. La mezavalora altitudo di La Paz, chef-urbo e duesma maxim populizita urbo di Bolivia, esas 3 650 metri sur la marala nivelo.

Salar (sika saloza lago) di Uyuni.
Yungas, proxim La Paz.

Bolivia havas granda biodiverseso, e variita reliefo e klimati. En la regiono Andiana vivas 39% de la habitantaro. Ol havas kolda e sika klimato dum tota yaro. Existas vasta platajo kun mezavalora altitudo di 3 800 metri. En ta regiono jacas l'urbi El Alto (nune la maxim populizita de Bolivia), Oruro e Potosí, ed anke Lago Titicaca la maxim alta navigebla lago del mondo.

Inter l'alta platajo e la basa tereni en la regiono di Chaco existas regiono kun mezavalora altitudo di 2.000 metri, ube jacas la Vali de Bolivia (Los Valles de Bolivia) e la regiono konocita kom Yungas. La departmento Cochabamba e parto dil departmento di Santa Cruz de la Sierra jacas en Los Valles de Bolivia. La regiono Yungas konsistas ek boski e foresti di altitudo. Ta regiono biogeografiala trairas la teritorii di Peru, Bolivia e la nordo di Arjentinia. Granda parto di Boliviana fluvii qui fluas vers la baseni di Amazon o dil fluvio di la Plata naskas en o trairas la regiono Yungas.

Ekonomio[redaktar | redaktar fonto]

Ministi en Bolivia.
 Precipua artiklo: Ekonomio di Bolivia

La precipua produkturi por exportacajo di Bolivia esas hidrokarbidi (45%), minerali (27%), industriala vari (24%) ed agrokultivala produkturi (4%). Ol esas la 8ma maxim granda produktero di plombo, la 9ma maxim granda produktero di arjento e la 10ma maxim granda produktero di zinko del mondo.

Bolivia havas la duesma maxim granda rezervuyi di naturala gaso de Sud-Amerika, quankam ol reprezentas nur 1% de omna rezervuyi del mondo. Nune existas programo por exportacar elektro produktita en termoelektrala e hidroelektrala centrali.

L'exportacaji kreskis plu kam 30% de 2010 til 2011. Brazilia (33%), Arjentinia (11%), Usa (10%), Japonia (6%), Peru (5%), Sud-Korea (5%), Belgia (4%), Populala Republiko di Chinia (3%) e Venezuela esas la precipua merkati por Boliviana produkturi.

Demografio[redaktar | redaktar fonto]

Segun rasala kompozuro, cirkume 30% de la Boliviani esas indijeni Quechua, e 25% Aymara. Altra indijeni populi esas Chiquitani (180 000) e Guarani (150 000). Pos la indijeni pura, la sequanta grupo esas la mestici. Blanki decendanti de Europani esas la 3ma rasala grupo. La decendanti de Afrikani esas nur 0,5% de la habitantaro.

De la habitantaro 64% vivas en urbi. La maxim populoza urbo esas Santa Cruz de la Sierra, kun 2 102 998 habitanti en 2010.[3] La maxim populoza departmenti esas La Paz, Santa Cruz e Cochabamba. La tri koncentras plu kam 70% de la habitantaro.

Ceremonio dil populo aymara en Copacabana.
Procesiono katolika en Calamarca.

Cirkume 96% de la habitantaro savas lektar e skribar. Programi adoptita pos 2006 permisis alfabetizar cirkume 820.000 personi en tota lando, precipue indijeni e rurani.[4] Ultre la Hispana, la konstituco di Bolivia agnoskas altra 37 oficala idiomi, de origino indijena: aymara, araona, baure, bésiro, canichana, cavineño, cayubaba, chácobo, chimán, ese ejja, guaraní, guarasuawe, guarayu, itonama, leco, machajuyai-kallawaya, machineri, maropa, mojeño-trinitario, mojeño-ignaciano, moré, mosetén, movima, pacawara, puquina, quechua, sirionó, tacana, tapiete, toromona, uruchipaya, weenhayek, yaminawa, yuki, yuracaré e zamuco. Anke segun la konstituco, tota publika funcioneri mustas savar adminime 1 indijena linguo ultre la Hispana.

Segun la demografiala kontado di 2001, 78% de la habitantaro deklaris esar katolila, 19% deklaris esar protestanta, cirkume 2,5% deklaris ne havar religio e min kam 0,2% deklaris praktikar altra religio, exemple la testi di Iehovah, Mohamedani, le Bahá'i, ed altri.

Segun internaciona statistiki, 1.6 milion Boliviani vivas exterlande, precipue en Arjentinia, Usa e Hispania, ube vivas cirkume 230.000 Boliviani.

Kulturo[redaktar | redaktar fonto]

Tradicionala vestari dum festo en Bolivia.
Diablada en la karnavalo di Oruro.

La kulturo di Bolivia havas influi del indijeni Quechua ed Aymara, e de altra populala kulturi di Latin-Amerika. Lando havas richa folkloro. Lua folklorala muziki e dansi esas distingiva e variata. Diablada, la "Danso dil diablo", eventas dum la karnavalo di Oruro, ed esas un di maxim importanta folklorala eventi di Sud-Amerika. La karnavalo di Oruro konsideresas Kulturala Patrimonio di la Homaro dal Unesco.

La kulturala developo dividesas en 3 historiala epoki: preKolumbiana periodo, koloniala periodo e republiko. Importanta arkeologiala ruini restas de preKolumbiana periodo, note en Tiahuanako, El Fuerte de Samaipata, Incallajta ed Iskanawaya.

Pordo di la kirko San Lorenzo, en Potosí. Arkitekturo de barok-epoko.

Hispaniani adportis lua kulturo e religiala arto, qua mixis kun lokala kulturi indijena e kreis richa e distingiva stilo por l'arkitekturo, pikto e skulto, konocata kom "mestica baroko". La precipua piktisto de barok-epoko esis Melchor Pérez de Holguín (1660-1732).

La maxim anciena exempli pri skulto en Bolivia evas del epoko di Tiahuanako, exemple la figuri skultita en la Pordo di Suno (Puerta del Sol). Dum kolonial epoko, la katolik artisto de raso aymara Tito Yupanqui skultis la Virgino di Copacabana en la kirko Nia Damo di Copacabana, la maxim anciena religiala imajo qua mixas influi Europana ed Indijena. Dum republikana epoko inauguresis la Skolo di Bel Arti en La Paz, e nomi quale Emiliano Luján, Hugo Almarás e precipue Marina Núñez del Prado[5] ganis notoreso.

La muziko havas Andiana, Aymarana, Afrikana e Hispana influi. Bailecito, Kullawada, Tonada (o, direte Tinku), Taquirari, Carnavalito, Lamento, Saya, Tuntuna, Taki Taki e Cueca esas populala stili en Bolivia. Existas diversa populara muzikisti qui kunfuzas moderna urbala muziko kun tradicionala ritmi e muzikala instrumenti. Ank existas multa tradicionala dansi en omna departmenti di Bolivia, quale la Danza del Sol y de la Luna e Danza de los Macheteros en Beni, Tinku e Cueca de Potosí en la departmento Potosí, edc.

Boliviana literaturo subisis l'efekti di la politikala nestabileso: multa skriptisti ekmigris o suspensis lua verko dum epoki opresiva. Anciena skriptisti, exemple Ricardo Jaimes Freyre, Adela Zamudio, Oscar Alfaro, e Franz Tamayo duras esar importanta.

Sporto[redaktar | redaktar fonto]

Stadio Hernando Siles, en La Paz.

Futbalo esas la maxim populara sporto en Bolivia. Unesma partio di futbalo en Bolivia eventis en 1896. Lua precipua esquadi esas Bolívar (de La Paz), The Strongest (La Paz), Club Deportivo Jorge Wilstermann (de Cochabamba), Blooming (de Santa Cruz de la Sierra), Oriente Petrolero (Santa Cruz de la Sierra), San José (de Oruro), Real Potosí (de Potosí), Universitario (Sucre) e Aurora (Cochabamba).

Altra populara sporti esas volebalo, basketbalo, la lokala sporto nomizita raket-balo*, biciklismo, automobilismo, e monto-acenso.

Referi[redaktar | redaktar fonto]

  1. BOLIVIA: POBLACIÓN TOTAL PROYECTADA, POR AÑO CALENDARIO, SEGÚN ÁREA Y DEPARTAMENTO, 2010 - 2015. Instituto Nacional de Estadística - INE. URL vidita ye la 2ma di decembro 2017.
  2. 2,0 2,1 2,2 2,3 Enciclopédia Delta Universal, vol 3 - pag. 1337 til 1343. Editora Delta, Rio de Janeiro, Brasil, 1989
  3. "The World Gazetteer"
  4. Bolivia erradicó el analfabetismo
  5. Caserita (s/d). Marina Núñez del Prado: Escultora boliviana (en (Hispana)). (HTML) URL vidita ye la 6ma di septembro 2012.
Commons
Commons havas kontenajo relatante a:


LocationSouthAmerica.png
Landi en Sud-Amerika
Arjentinia | Bolivia | Brazilia | Chili | Kolumbia | Equador | Guyana | Panama | Paraguay | Peru | Surinam | Trinidad e Tobago | Uruguay | Venezuela
dependanta teritorii: Falklandi | Franca Guyana