Que sais-je?
"Que sais-je?" esas serio de libri editita da la franca editerio Presses universitaires de France (PUF).
La skopo dil serio esas provizar la laika lektanto per acesebla introdukto a studio-feldo skribita da experto en ta feldo. Tale, li esas bona exemplo di haute vulgarisation (alta popularigo). La frazo "Que sais-je?" cherpesis de la verki dal franca esayisto Michel de Montaigne.
Iniciita en 1941 da Paul Angoulvent (1899-1976), fondinto di Presses Universitaires de France, la serio nun inkluzas plu kam 3900 libri da plu kam 2500 autori, e tradukita aden plu kam 43 lingui. Ula libri vendesis plu kam 300.000-foye (exemple ti da Jean Piaget).
Singlayare, 50 til 60 nova libri adjuntesas al kolekturo, qua kontenas dek diferanta serii. Tale, ol esas certe la maxim longe duranta 'enciklopedio' en paperakuvrila formato. La ensemblo de temi esas vere enciklopediatra, pri omno de chanson de geste e Homer, til gastronomio e libera volo.
Ne omna temi esas intelektala - li povas inkluzar aktuala temi, quala violento en sporto, o personal instrukto. La prizento di informo esas diversa e povas konsistar ek introdukto a temo, detaloza esayo pri penso-skolo, od analizo di aktual eventi. Til 2004, plu kam 160 milion kopii vendesis mondvaste.
La serio esas nenormala pluramaniere: unesme, la preco di singla tomo esas sama e minima (€9 en 2011), e singla libro havas 128 pagini.
Kande libro desaktualeskas, ol povas retraktesar de la serio, od ol povas aktualigesar. Kelkafoye ta aktualigo esas kompleta ri-skribo, quale exemple Parfumerie (tomo 1888), originale skribita da Edmond Roudnitska en 1980 e ri-skribita da Jean-Claude Ellena en 2006, ma prezervante la sama numero en la serio.
La serio esas simila kam altra serii quala Collection 128 editita da Armand Colin en Francia, Very Short Introductions editita da Oxford University Press, e C.H. Beck Wissen editita da Verlag C.H. Beck.