1556. En Chinia esas tertremo, la maxim severa en registrigata historio, en qua cirkume 830.000 homi mortis. Esis destruktado en areo di larjeso 840 km. Multa homi ye ta periodo lojis en kavi en klifi, e li mortis kande oli krulis. En la urbo Huaxian, proxim la centro di la tertremo, omna strukturi krulis e plu kam duimo de la rezidanti mortis.
1832. En Paris, la piktisto Édouard Manet naskis. Ilua patro esis judiciisto, ed esis supozata ke Édouard divenus legisto. De 1850 il studiis piktado; de 1853 til 1856 il voyajis en Europa e vidis influiva pikturi. Il apertis studieyo en 1856. Notenda frua verko esas Le déjeuner sur l'herbe di 1863. En realismala stilo il piktis diversa ceni di la lora tempo. En 1882 il produktis ilua lasta notenda pikturo, Un Bar aux Folies-Bergère. Il mortis en 1883.
2003. La lasta signalifi di la kosmosondilo Pioneer 10 recevis. Ol esis 12 miliard km, 80 astronomiala unaji, de Tero, e depos 27 di aprilo 2002 ol ne sendabis utila informeso. Pioneer 10 lansesis ye 3 di marto 1972 e renkontris Jupitero dum novembro 1973. Ye 13 di junio 1993 ol pasis la orbito di Neptuno (qua lore esis plu fore de la suno kam Plutono), e tale ol divenis la unesma homala konstrukturo qua livis la sunala sistemo. Voyajante ye olua nuntempa rapideso, ol esos plu distanta kam la vicina stelo Proxima Centauri pos 26.118 yari.
