Shablono:Eventi

De Wikipedio
Salti al navigilo Irez a serchilo
en historio
dum decembro:
50, 100 e 250 yari ante nun …


12 di decembro 1970. En Kenia, la kosmosondilo Uhuru lansesis; ol esis la unesma kosmosondilo lansita por l'astronomio di X-radii. Ol esis misiono di NASA, e la nomo di la sondilo signifikas "libereso" en la Swahilia linguo, tale nomizita pro la gastigemeso di Kenia. Pozita aden orbito cirkum Tero, e rotacanta kun periodo cirkume 12 minuti, ol surveyis la tota cielo por trovar X-radii. La misiono finis en marto 1973 ed esis sucesoza. La Uhuru-katalogo, la unesma ampla katalogo di astronomiala X-radii, kontenas 339 objekti.

16 di decembro 1920. Granda tertremo eventis en Chinia, en Haiyuan-komtio. Olua forteso esis 7.8 che la skalo di Richter. Posa shoki eventis dum la sequanta tri yari. Cirkume 200.000 homi mortis: plu kam 73.000 en Haiyuan-komtio e plu kam 30.000 en Guyuan-komtio. Urbi en sep provinci sufris domajo; plura fluvii esis barata, o lia voyo alteresis. Plusa homi perisis dum la sequanta severa vintro, nam la posvivanti volis lojar en provizora hemi.

17 di decembro 1770. En Bonn, la kompozisto Ludwig van Beethoven esis baptata. Ilua patro esis Johann Beethoven, kantisto ye la kapelo di la arkiepiskopo di Köln, di qua la korto esis en Bonn; il anke esis muziko-docero. Ilua matro esis Maria Magdalena Keverich, qua esis mariajata a Johann Beethoven en 1767. Elua patro, Johann Heinrich Keverich, esis chefa koquisto ye la korto di la diocezo di Trier.