Shablono:Eventi
dum oktobro
50, 100 e 150 yari ante nun …
20 di oktobro 1976. La futbalisto Diego Maradona, dek dii avan lua 16ma naskodio, unesmafoye aparis en profesionala ludo di futbalo, kun la esquadro Argentinos Juniors, de Buenos Aires, kontre Talleres de Córdoba. Maradona, naskita en Buenos Aires, recevis futbalo kande il evis tri yari, e balde havis granda intereso en la ludo; evante ok yari, ilua talento esis remarkata, ed il divenis membro di Los Cebollitas, juniora esquadro di Argentinos Juniors. De 1976 til 1981 il ganis 115 goli dum 167 apari kun Argentinos Juniors, e pose il transferesis a Boca Juniors, anke en Buenos Aires, per transfero-pago quar milion Usana dolari. En 1982 il transferesis a FC Barcelona en Hispania, per pago 7,6 milion dolari, ed en 1986 il transferesis a SSC Napoli en Italia, per pago 10 milion dolari. En la Mondala Kupo di Futbalo 1986 en Mexikia, il esis chefo di la esquadro di Arjentinia, qua vinkis West-Germania en la finala ludo.
16 di oktobro 1926. En Budapest, Hungaria, la opero Háry János, da Zoltán Kodály, unesmafoye videsis. La rakonto fondesis sur komika poemo da János Garay, pri Háry János, evoza soldato olim en la Austriana armeo, qua, en taverno, amuzas la altri per fantastika rakonti pri sua heroismo. En la opero, qua esas en la stilo di melodramo (Singspiel), Háry János aparas en la prologo ed epilogo; la cetera dramato montras quar de ilua audacaji, qui eventas en Moskva, Italia ed Austria. Kódaly pose facis orkestrala asembluro, en sis movimenti, de muziko en la opero; ol unesmafoye pleesis en Barcelona en marto 1927.
29 di oktobro 1876. En Bengal, nuntempa Bangladesh, forta ciklono atingis la marbordo di Backerganj. La ciklono formacesis en la sud-esto di la Bayo di Bengal ye 27 di oktobro. Cirkume 200.000 homi mortis, de qui duimo dronesis en la ondo-agitado, di alteso 3 til 13 metri; altri mortis en sequanta famino.