Striko

De Wikipedio
Jump to navigation Jump to search

Striko esas laborohalto produktigita da amasala refuzo di employati. Striko maxim-multa-kaze eventas en respondo a plendaji de employati. Striki divenis importanta dum l'industriala revoluciono, kande grandanombra laboro divenis importanta en fabrikerii e mineyi. Li ofte uzesas da laboristi por aquirar plu multa yuri o salario, o por protestar kontre mala standi. Striki plu rare funcionabis por instigar chanjo guverneriala o mem revolucioni.

Sindikati esas important infrastrukturo por organizar striki. En kelka landi striki esas nur legala, kande sindikati deklarabis oli.

En maxim multa landi, striki rapide konsideresas nelegala, pro la proprietanti di fabrikerii havar multa plu politikala povo kam laboristi. Maxim multa westala landi partale legaligis striki en fino dil 19ma o frua 20ma yarcenti. Multa komunista landi anke interdiktis striki.

On povas strikar en la privata sektoro, ma anke en la publika sektoro. Tamen, ofte existas restrikti od interdikti por ula publika laboristi. Striki anke eventas en karceri, ma legi pri karcerala striki ofte esas tre represiva kontre li.

La yuro a strikar esas agnoskata da la Europana Uniono en diversa charti e legi ed omna membrostati devas generale garantiar ol, ma la yuro esas sur la domeno dil membrostati. Esas posibla limitar e interdiktar striki por poka okupivi. La Charto Sociala Europana dil Konsilantaro di Europa anke inkluzas la yuro a strikar.