TivoliVredenburg

De Wikipedio
Salti al navigilo Irez a serchilo
TivoliVredenburg en 2014

TivoliVredenburg esas muzik-edifico an la Vredenburgkade en Utrecht, Nederlando, kreita per kunfuzo dil Muziekcentrum Vredenburg e Tivoli Oudegracht.

Ol esas konstruktita sur la situo dil olima Muziekcentrum Vredenburg, quo ecepte la Simfoni-halo demolisesis.  Ol apertesis en 2014 e kontenas kin koncerto-hali e kafeerio, kun tota halkapaceso di 5500 personi.

Unesma projeti pri demoliso e rikonstrukto dil Muziekcentrum Vredenburg komencis fine dil 1980a yari.  En la kadro di rinovigo dil stacion-areo on pripensis ampligo dil muzikocentro kun poppodium Tivoli e la SJU jazzpodium, qui amba subisis problemi logistikala ed edificala.  En 2004 la municipo Utrecht prizentis la unesma konkreta projeti pri la nova edifico sub la labornomo Muziekpaleis, por kunfuzar la tri organizuri.  En 2010 konstrukto komencis kadre dil projeto CU2030.

La edifico esas desegnita quale vertikala urbo, tale ke la diversa koncert-hali havas sua propra identesi, e konektesas per marchovoyi e placi.  La fronto e reverso esas grandaparte vitra, ube ula chambri parte eksalias; la flanki esas sorto di aerobulostrukturo kun hike ed ibe ronda fenestri.

Kun sua desegno di kin tote diferanta hali tra non etaji la edifico esas unika en la mondo.  La desegno dil edifico facesis dal arkitektofirmo di Herman Hertzberger e Patrick Fransen; singla nova halo desegnesis da diferanta arkitekto.  La nomi di la hali esas: Grote Zaal, Ronda, Pandora, Cloud Nine, Hertz.

La edifico kontenas, ultre la publike acesebla hali e placi, anke diversa utila spaci, inkluzanta 26 lojii, du artistofoyeri, diversa exerceyi ed ateliero.  En la kelero dil edifico esas koqueyi e granda spaco por kargo e deskargo di kamioni.  Entote sis kamioni povas kargesar e deskargesar samtempe.  La kargospaco havas propra, mi-subtera enirovoyo qua venas de la Paardenveld, proxim la Bergstraat.

La edifico proprietesas da la municipo Utrecht e lokacesas da la Stichting TivoliVredenburg, quo responsas pri jerado.  La Stichting konsistas formale ek direktisto e surveyo-komitato.  Ultre organizo di propra eventi, la edifico lugesas da la Stichting ad altri, exemple por kongresi, prizenti e kunveni.  La kafeerio Het Gegeven Paard jeresas da nedependanta organizuro. Tivoli de Helling pos la fuzo duras kom nedependanta estrado.