Wilhelm Hauff

De Wikipedio
Irez a navigado Irez a serchilo

Wilhelm Hauff (* 29ma di novembro 1802 en Stuttgart, dukio Wurtemberg; † 18ma di novembro 1827 en Stuttgart, rejio Wurtemberg) esis Germana skriptisto di la romantika epoko.

Biografio[redaktar | redaktar fonto]

Ilua patro, August Friederich Hauff, esis sekretario en la ministerio di exterlanda aferi di Wurtemberg, la matro nomesis Hedwig Wilhelmine Elsaesser Hauff. Wilhelm havis frato plu evoza, Hermann (n. 1800), e du fratini min evoza, Marie (* 1806) e Sophie (* 1807). Pos mortir ilua patro, ye 1809, la matro kun la filii translojis a sua patro Karl Friedrich Elsäßer, en Tübingen. Wilhelm frequentis la Latin-skolo ibe e de 1817 la kuventala skolo en Blaubeuren. De 1820 til 1824 lu studiis teologio en la universitato di Tübingen.

De 1824 til 1826 Hauff employesis en Stuttgart kom hemal instruktisto di la pueri di generalo barono Ernst Eugen Freiherr von Hügel, la ministro di milital aferi di Wurtemberg. Por li lu skribis fabli qui pose editesis en la libro Märchen Almanach auf das Jahr 1826 (Fablal almanako dil yaro 1826). Kelki de ta rakonti es populara en la uzeyo dil Germana til hodie, exemple Der kleine Muck (La mikra Muk), Kalif Storch (Kalifo cikonio) e Die Geschichte von dem Gespensterschiff (La rakonto pri la navo dil fantomi) — omna tri lokizita en la oriento; pluse: Der Zwerg Nase (La nano Nazo), Das kalte Herz (La kolda kordio) e Das Wirtshaus im Spessart (L'albergo en foresto Spessart) — lokizita en Germania.