Z-Cars

De Wikipedio
Salti al navigilo Irez a serchilo

Z-Cars o Z Cars esis britana televizionala dramato-serio kreita da Troy Kennedy Martin pri la laboro dil automobilala uniform-portanta polico en la fiktiva urbo Newtown, fondita sur KirkbyLancashire (nun en Merseyside).  Produktita da la BBC, ol debutis en januaro 1962 e duris til septembro 1978.

La serio diferegis de antea polico-"procedali".  Pro sua min normala norda angla lokizo, ol injektis nova elemento di severa realismo aden la imajo di la polico; che ula spektanti ico esis nebonvenanta.

Z-Cars duris entote 803 epizodi, min kam duimo ek li transvivas.  Reguloza steli inkluzis Stratford Johns (Detective Inspector Barlow), Frank Windsor (Det. Sgt Watt), James Ellis (Bert Lynch) e Brian Blessed ("Fancy" Smith).  Barlow e Watt plu tarde divenis karakteri en separata inspirita serio Softly, Softly.

La nomo Z-Cars relatas imaginala "Z"-Diviziono di la lokala polico.  La introdukto-muziko fondesis sur tradicionala Liverpoolana folkloro-kansono, ed adoptesis dal futbal-klubo Everton kom sua oficala himno.

La titulo venas de la radio-identeso-signi atribuita da Lancashire-Polico: li literizis divizioni de nordo a sudo; "A"-Diviziono (lokizita en Ulverston) esis la desatachita parto di Lancashire lore, cirkum Barrow-in-Furness; "B"-Diviziono reprezentis Lancaster, e tale plus.  Literi plu fore en la alfabeto esis en la sudo cirkum Manchester e Liverpool.  La TV-serio uzis la ne-existanta signi Z-Victor 1 e Z-Victor 2.

La titulo ne venas del automobili vidita en la serio, quala la Ford Zephyr e Ford Zodiac.  La Zodiac nultempe uzesis dal britana polico kom normala patrolio-vehilo.