Al-Kaida

De Wikipedio
Standardo di Al-Kaida en Irak.

Al-Kaida ne esas hierarkial (o lineal) organizuro, ma laxe relatanta grupo di teroristo-bandi. Pro ito esas tre desfacila sizar ula parti di la organizuro. La spiritala chefo di la Al-Kaida esis Araba-naskinta Osama bin Laden.

On supozas, ke teroristo-bandi existas preske omnaloke en la mondo. Teroristo-bando signifikas en ica relato ula grupo, qua financizas ipse lua agado. On suspektas ke la trupi aranjas lua financo, adminime partale, per kriminala moyeni. Ofte la trupi projetas l'ataki nedependante e kontaktas altra bandi nur kande li bezonas.

La vorto al-Kaida signifikas "bazo", ma fakte ol ne esas ula loko, vice ol esas la spiritala bazo od inspiranta fonto dil teroristi. La mesajo di lua chefi pri la skopo dil iraco e di la santa milito (jihado) expansas per la cirkulanta predikeri e rekruteri o per la reto, l'inventuro dil ocidentala mondo.

Importanta rekruto-loki di nova adepti esas moskei e Korano-skoli. Nun on rekrutas anke en universitati e tala instituti di l'alta edukado. La maxim motivoza rekrutarii ed adepti duktesas ad exerco-kampeyi. Ibe la maxim harda personi esas selektita kom l'exekutanti di l'ataki; ofte la projeteri esas altra personi.

L'unesma exerco-kampeyi fondesis dum la yari 1980a en Afganistan. Tatempe, dum kolda milito, mem Usa suportis Mohamedana grupi en la milito kontre Sovietia. Pose, Sovietia krulis, e kolda milito finis chanjinte la relati en la mondo. L'ocidentala e la ne-Mohamedana mondumo divenis la emi di la teroristi. On savis en 2005 ke l'exerco-kampeyi di al-Kaida jacis en Afganistan e Sudan. Segun sekreta guato-servi ocidentala en la kampeyi docesis, inter altri, Islamana lego, proxima kombato e l'uzo di l'explosivi, armi ed veneni.