Arthur Conan Doyle

De Wikipedio
Arthur Conan Doyle
Profesiono: skriptisto
Lando: Unionita Rejio
Naskodato: 22 di mayo 1859, 1858
Nasko-loko: Edinburgh, Skotia
Mortodato: 7 di julio 1930, 1929
Morto-loko: Crowborough, Sussex, Anglia
Retoloko: https://conandoyleestate.com

Arthur Conan Doyle (1859 til 1930) esis Skota skriptisto, qua kreis la personajo Sherlock Holmes.

Ilu divenis mediko en 1881 pos studiar ye l'universitato di Edinburgh. Il praktikis en Southsea, ye la suda litoro di Anglia; il skribis rakonti dum ke il vartis klienti, ed en 1887 aparis ilua unesma romano A Study in Scarlet, qua esis rakonto pri Sherlock Holmes. Plusa romani aparis, pri diversa temi; la sequanta pri Holmes esis The Sign of Four en 1890. L'unesma kolekturo di kurta rakonti pri Holmes esis L'Aventuri di Sherlock Holmes, qui aparis en The Strand Magazine de julio 1891 til junio 1892.

La fino di Sherlock Holmes[redaktar | redaktar fonto]

Holmes e Moriarty apud la Reichenbachfall; ca pikturo akompanis la rakonto en decembro 1893

Ye 4ma di mayo 1891 detektivo Sherlock Holmes mortis ye l'aquofalo Reichenbachfall en Suisia: tale segun la rakonto The Final Problem. Holmes, qua dum longa tempo inquestis l'agadi di la kriminestro profesoro Moriarty, kredis ke il balde ruptos ilua organizuro. Holmes anke konciis, ke Moriarty deziras destruktar il. Por avancigar l'afero, Holmes voyajis a Suisia, kun kolego Watson, e li lojis ye Meiringen. En la vicina Reichenbachfall, Holmes desaparis, poslasinte letro a Watson explikante, ke il expektas renkontrar Moriarty. Segun supozajo, Holmes e Moriarty falis til morto dum ke li luktis apud l'aquofalo. La rakonto The Final Problem aparis en The Strand Magazine en decembro 1893.

Ri-aparo di Sherlock Holmes[redaktar | redaktar fonto]

Conan Doyle esperis ke, pos la supozata morto di Holmes, il povos skribar nur rakonti quin il deziris skribar, pri altra karakteri. Tamen la karaktero Holmes esis tante populara, tale ke il mustis produktar plusa rakonti pri la famoza detektivo. La romano The Hound of the Baskervilles, aventuro pri Holmes ante ilua morto en Suisia, aparis en epizodi, de agosto 1901 til aprilo 1902.

Por plusa kurta rakonti, esis agnoskata ke Holmes ne mortis ye Reichanbachfall (advere, nulu spektis la finala falo di Holmes e Moriarty apud l'aquofalo); en L'Aventuro di la Vakua Domo il aparas, pos tri yari di voyajado en diversa landi, ye la praktikeyo di Watson.

La finala kolekturo di kurta rakonti pri Holmes, The Case-Book of Sherlock Holmes, aparis en The Strand Magazine de oktobro 1921 til aprilo 1927.

Dum sua skribado-kariero, Arthur Conan Doyle duris produktar romani pri altra temi. La maxim famoza esas La Perdita Mondo, qua aparis en 1912, pri expediciono di Profesoro Challenger e kolegi ad alta planajo en Sud-Amerika, ube dinosaurii ed altra supozeble extingita animali ankore existis.

Extera ligili[redaktar | redaktar fonto]