Fristaden Christiania

De Wikipedio
Pordego a Fristaden Christiania

Fristaden Christiania (lit. Libera o Sendependa Urbo Christiania), maxim ofte kurte nomizata Christiania, esas su-deklarita mi-sendependa inkluzajo en la dana chefurbo København.

Christiania fondesis en 1970, kande grupo de "hippie" en la distrikto Christianshavn di København okupis l'abandonita militala kazerno Bådsmandsstrædes Kaserne.

Komence la dana guvernerio probis eviktar l'okupanti, ma de la fino di la yari 1970a Christiania toleresis kom "sociala experimento".  Tamen esis kontroversi pri nepago di aquo ed elektro, la drogi-komerco e mankanta restorerio- e konstrukto-permisi.  Ica disputi esas intertempe plu-min solvita, ma la edifici en Christiania ankore ne konformigas su al publika edifico- e spaco-reguli.  Ico esas la kerno di la prezenta konflikti kun la dana stato.

Ula domi esas konstruktita direte sur la protektata muro- e fortreso-areo, e segun la projeto dil stato parto de ta domi mustas forigesar e la historiala muro restauresar.  La dana guvernerio volas ke en parto del distrikto privata o lokacata domi konstruktesez, ma en stilo e formo qui respektas la experimentala atmosfero e sociala karaktero di Christiania.  Ico refuzesas da la rezidanti nam li volas retenar la kolektiva proprietajo.

Christiania esas acesebla per diversa eniropordegi, e privata automobili esas en la tereno ne permisata.  La maxim famoza 'strado' en Christiania esas Pusher Street, ube "mola" drogi libere komercesas.  "Harda" drogi esas ibe interdiktata.  La vicineyo havas formo de su-guverno. Ultre Christiania-centro kun grandaparte okupata existinta edifici, la quartero havas anke bosko cirkume un kilometro longa, ube kelka dometi e farmeyi trovesas, qui grandaparte dal rezidanti ipsa konstruktesis ek riutiligita materio.  Christiania havas nula skolo, ya centro por infanto-sorgo, kelka manjajo-butiki, postokontoro por lokala posto, biblioteko, 'urbana muzeo' e propra eskombro-servo.  En la centro di Christiania esas diversa drinkeyi e restorerii.