Georges Feydeau

Georges Feydeau
Profesiono:	dramatifisto
Lando:	Francia
Naskodato:	8 di decembro 1862
Nasko-loko:	Paris, Francia
Mortodato:	5 di junio 1921
Morto-loko:	Rueil-Malmaison, Francia

Georges Feydeau (1862 til 1921) esis Franca skriptisto teatrala.

Naskinta en mez-klasa familio, ilu kreskis en artala e literaturala medio. De lua yunaro, ilu komencis skribar teatraji, e divenis amiko di Gustave Flaubert, Théophile Gautier ed Alexandre Dumas, filio. En 1882, unesmafoye pleesis un ek lua akti, Par le fenêtre («Tra la fenestro»).

Lua unesma importanta verko, Tailleur pour dames («Talioro por mulieri»), havis multa bona acepto en 1886 che la teatro Théâtre de la Renaissance, kun gratuli da Labiche. Ye la sama yaro, ilu mariajis su kun Marie-Anne Carolus-Duran, filiino de lora prosperoza piktisto Carolus-Duran, e la mariajo helpis lu desembarasar su de financala problemi, pos serio di sensucesa teatraji.

En 1890 Feydeau komencis studiar komika teatraji, nome verki da Eugène Labiche, Alfred Hennequin, e Meilhac. Ilu profitis del studio, ed ye la sequanta yaro ilu skribis du teatraji qui sucesis en 1892: Monsieur chasse! («Sinioro chasas!»), e Champignol malgré lui, ca lasta triumfema suceso, pleita 434 foyi en 1893. Ank en 1892 ilu skribis «la Sistemo Ribadier», qua sucesis en Berlin, London e New-York. Georges Feydeau novigis la jenro vaudeville, segun ula kritikisto.

Malgre la granda suceso, Feyedeau komencis havar problemi pri lua mariajo dum la komenco di la 20ma yarcento, pro lua granda spensi - ilu havis tablo permanante rezervita che restorerio Maxim's - e lua granda pekuniala perdaji en hazardoludi, ed en 1901 ilu mustis vendar multa chera artala objekti. L'opero Le Billet de Joséphine, skribita en 1902 ensemble kun Alfred Kaiser esis fiasko, ed retrotiresis pos 16 pleaji. En 1907 ilu skribis Un puce à l'oreille («Pulco en l'orelo») qua judikesis kom un ek lua maxim granda sucesi. Tamen, pro la morto di un ek la maxim importanta aktori pos la 86ma pleajo ol retrotiresis, e ne itere pleesis en Paris til 1952. En 1916, ilu divorcis de Marie-Anne Carolus-Duran.

Dum vintro di 1918 Feydau infektesis da sifiliso, qua rapide plumaleskis ed efektigis dementeso. Feyedeau eniris komato, ed ye la 5ma di junio 1921 ilu mortis en sanatorio che Rueil-Malmaison, urbo vicina a Paris.