Historio di brodkastado
Brodkastado en Belgia
[redaktar | redaktar fonto]
Ye 28 di marto 1914 proxim Bruxel, Belgia, komencis radio-dissendi, qui transmisesis de hangaro en la domeno di la Rejala Palaco di Laeken.
La pekunio por la projeto furnisesis da la rejulo Albert 1ma di Belgia, qua havis intereso pri komunikar per radio kun la Belga Kongo-lando. La teknikala preparadi facesis da Belga ciencisto Robert Goldschmidt (1877-1935) e Franca ciencisto Raymond Braillard (1888-1945).
La dissendi probable esis la unesma reguloza radio-dissendi en la mondo: singla-semane, koncerto esis transmisata. La radio-ondi atingis cirkume 65 km de la transmisilo. La dissendi duris til la komenco di la milito en agosto 1914; pose, por ke la staciono ne esus utiligata da irgu por militarala skopi, la radio-masto esis demolisata, ed omna aparati qui esis ne-forigebla esis destruktata.
Brodkastado en Usa
[redaktar | redaktar fonto]Ye 20 di agosto 1920 en Detroit, Michegan Usa, la unesma komercala radio-staciono komencis transmisar, kun voko-signo 8MK. La staciono esis grandaparte establisata da la vice-prezidanto e direktanto di la Detroit News, William E. Scripps, qua havis intereso pri radio de plura yari. La unesma transmisi esis probi; ye 31 di agosto la Detroit News anuncis ke vesperala brodkasti di la "Detroit News Radiophone" komencos ca-die. La unesma brodkasti grandaparte konsistis ek pleado di fonografili ed anunci di novaji.