Kooperativo

De Wikipedio
Salti al navigilo Irez a serchilo
La jemela pini, internaciona simbolo di la kooperativi.
La Germana banko Volksbank Herrenberg-Nagold-Rottenburg esas exemplo pri kredito-kooperativo.

Kooperativo esas autonoma asociuro de homi unionita volunte por satisfacar lia komuna ekonomiala, sociala e kulturala bezoni e deziri per kunproprietata e demokrate jerata komerco.

Kooperativi inkluzas senprofita komuneso-organizuri e komerci proprietata e jerata dal uzanti di lia servi (konsumero-kooperativo); dal employati (laboristo- kooperativo); da la habitanti (domo-kooperativo); hibridi quala laboristo-kooperativi qui esas anke konsumero-kooperativi o kredit-unioni; kooperativi qui unionas civila socio e lokala aganti por satisfacar komuneso-bezoni; e duesma- e triesma-ranga kooperativi, di qui la membri esas altra kooperativi. En 2012 on evaluis ke cirkume un miliard homi esis membri di adminime un kooperativo, e ke la revenuo dil maxim granda triacent kooperativi en la mondo atingis $2,2 bilion - equivalanta la sepesma maxim granda lando dil mondo.

Coop, un ek la maxim granda kompanii por komerco engrosa ed endetala de Suisia, strukturigesas en formo di kooperativo.

Kurte, on povas definar kooperativo kom "entraprezo qua produkas o distributas vari o provizas servi, jerata da sua membri por lia reciproka profito, ofte organizata da konsumeri o farmisti." Kooperala komerci esas ordinare plu ekonomiale robusta kam altra formi di entraprezo, nam 80% de li transvivas sua unesma kin yari kompare altra komercala modeli (41%). Kooperativi freque havas sociala skopi quin li vizas atingar per retrokolokar proporciono de profiti aden la komuneso. Exemple, en 2013, endetala kooperativi kolokis 6,9% de sua pre-imposta profiti aden la komuneso, kompare 2,4% da altra supermerkati.

La International Co-operative Alliance esis la unesma internaciona asociuro formacita dal kooperala movado. Ol inkluzas la World Council of Credit Unions. Duesma organizuro pose aparis en Germania, la International Raiffeisen Union. En Usa, la National Cooperative Business Association (NCBA) servas kom la maxim olda nacionala kooperala asociuro. Ol vizas sekurigar por kooperala komcerci la sama posiblesi kam altra komerci, ed aceso da konsumeri a kooperativi en la merkato. l'Usana Nacionala Kooperativo-Banko fondesis en le 1970. Ante 2004, nova asociuro qua enfokigas laboristala kooperativi fondesis, nomizita United States Federation of Worker Cooperatives.

Depos 2002 kooperativi e kredit-unioni povas uzar che la interreto la domeno .coop.