Mala fides

Mala fides esas Latina expresuro signifikanta «mala intenco». Ol uzesas por dicar ke ula persono agas intence trompar o nocar altru, od intence trompar su propra. L'ideo pri uzar mala fides kontre altru multafoye asociesas kun l'ideo pri dolo, quo esas l'intenco pri kriminar e la korespondanta agado kriminoza. Mala fides esas la volunto pri trompar, e povas existar mem se nula agado kriminoza praktikesas.

On parolas pri mala fides en proceso kande ulu (un ek la parti de ula proceso, o triesma persono) agas intence, kun maleso, por interferar en la rezulto di ula proceso. Exemplo pri agado mala fides de triesma persono: advokato qua mentias pri la motivo pro quo lua kliento ne aparis en ula audienco.

Kande mala intenco deskovresas en judiciala proceso, la judiciisto povas o mustas aplikar puniso kontre la parto qua agis mala fides, segun determinata en la legaro di singla lando. Freque la gradizo di la puniso varias segun la tipo di proceso (se kriminala proceso, civila proceso, se esas proceso en qua la Stato esas parto, edc).

Konceptajo pri mala fides (France «mauvaise foi») ank existas en la filozofio, nome en Existencialismo. Ta konceptajo uzesis unesmafoye da Jean-Paul Sartre en lua libro L’être et le néant, publikigita en 1943, por deskriptar la fenomeno per qua homo negas a su propra ke lu esas absolute libera e ke lu povas selektar omno. Segun Sartre, l'absoluta libereso e la sento pri kompleta solitareso dum la decidi produktas intensa angoro en la homala mento. Pro to, homo mentias a su propra pri ta libereso, e dicas ke lu mankas libera tempo, o ke lu subisas sociala presi, edc, por celar de lua mento ke lu esas libera por decidar. Sartre nomizis mala fides («mauvaise foi») ta mentii kreata da homala mento por trompar su propra.

Extera ligili (en la Portugalana)

• Inacreditável Exemplo de Litigância de Má-Fé
• A ma-fé na analítica existencial Satriana - diserto en la Federala Universitato di Bahia - UFBA
• texto di L’être et le néant tradukita a la Portugalana.