Marken

De Wikipedio
Marken

Marken (pr. c. markə(n); lokala dialekto: Mereke) esas vilajo en la municipo Waterland en la provinco Norda Holando, Nederlando.

Ol havis habitantaro 1.810 en 2012 e formacas peninsulo en la lago Markermeer; ol esis olim insulo en la Zuiderzee.  La karakteriziva ligna domi di Marken esas turist-atraktivo.

Dum kelka tempo dum la tarda 19ma e frua 20ma yarcenti, Marken ed olua habitanti esis la foko di konsiderinda atenco da folkloristi, etnografi e fizikal antropologiisti, qui egardis la mikra pesko-urbo kom restajo del tradicionala indijena kulturo qua desaparis dum ke la modernigo di Nederlando rapideskis. Inter li esis Johann Friedrich Blumenbach qua examenis kranio del insulo di homi quan il nomizis Batavus genuinus; e la belga piktisto Xavier Mellery qua sejornis en Marken ye prego da Charles De Coster.  Mellery pregesis facar ilustrala laboro ed il livris plura intimista verki.

La projeti da Cornelis Lely vizis inkluzar l'insulo aden la Markerwaard.  La digo, konstruktita en 1941 en la nordo, esas l'unesma fazo de ta projeto qua cesis pro la Milito.

En 1983, la Marker-Muzeo pri la historio dil insulo apertesis.  Marken esis aparta municipo til 1991, kande ol fuzesis aden la municipo Waterland.