Markthal (Rotterdam)

De Wikipedio
Salti al navigilo Irez a serchilo
La Markthal en 2015

La Markthal te Rotterdam (Merkato-halo di Rotterdam) esas rezidala e butikala edifico kun interna merkato-halo, situita inter la stradi BinnenrotteHoogstraat e Blaak en Rotterdam, Nederlando.

Ol apertesis ye 1ma oktobro 2014 da Rejino Máxima.  Ultre surkovrita merkato la komplexo kontenas 228 apartamenti, 4600 m² de butikospaco, 1600 m² de restorerii e gareyo por plu kam mil automobili.

La Markthal desgnesis dal arkitekto-firmo MVRDV.  La griza naturpetra edifico havas arkoformo quale kavalfero.  Ol havas an amba facii vitra fasado.  La laminita vitropaneli, di qui la maxim multa esas quadrata di larjeso 148,5 centimetri, pendas en kabloreto-fasado di alteso 34 metri e larjeso 42 metri, tale la maxim granda en Europa.  Singla fasado havas 26 vertikala e 22 horizontala kabli.

La interna fasado di la Markthal kovresas per artoverko di grandeso 11.000 m² da Arno Coenen ed Iris Roskam, titulizita Hoorn des Overvloeds.  Ica titulo referas la Cornucopia, korno ek Romana mitologio qua simbolizas abundo e sacieso.  La verko montras plugrandigita frukti, legumi, grani, fishi, flori ed insekti.  En la fundo esas videbla anke la St. Laurenskerk kun turmi.