Nutrivo-banko
Nutrivo-banko esas ne-komercala, karitatala organizuro quo distributas nutrivo a ti qui ne povas komprar sat multa nutrivo por evitar hungro.
En Nord-Amerika ed Australia, nutrivo-banki maxim ofte uzas la "magazino"-modelo. Li servas kom depozeyi por mikra agenterii, e ordinare ne ipsa disdonas nutrivo direte a hungranti. Ica agenterii inkluzas nutrivo-provizerii, supo-koqueyi, senhemo-azili, orfanerii, e skoli.
Exter Nord-Amerika ed Australia, la "fronto"-modelo ofte trovesas. Tala nutrivo-banki disdonas nutrivo direte al uzanti. Por amba modeli, fonti de nutrivo inkluzas farmeyi, fabrikerii, distributerii e butiki qui ofte havas ecesa nutrivo quon li ne povas vendar. Ula nutrivo-banki anke recevas nutrivo de individua donacanti, inkluzante sua volunteri.
La unesma nutrivo-banko dil mondo establisesis en Usa en 1967, e depos lore mili aparis cirkum la mondo. En Europa, ube til recente on poke bezonis oli pro sistemi di sociala sekureso, nombri kreskis rapide pos la globala augmento di nutrivo-preci depos 2006, ed aparte pos la financala krizo di 2007-08.
La kresko di nutrivo-banki esas ordinare bonvenanta, aparte che dextrani, ma anke sinistrani, qui vidas li exemple di aktiva komuneso nedependanta de la stato. Tamen, profesori ed altri expresis sucio ke la kresko di nutrivo-banki povus erodar politikala susteno por sociala sekureso. Inquestisti raportis ke ula nutrivo-banki esas neefikanta kompare statala servi, e ke ula homi shamas pro rekursar a li.