Paulus Moreelse
Paulus Moreelse (Utrecht, 1571 - Utrecht, 6ma di marto 1638) esis nederlandana portreto-piktisto.
Moreelse esis studento di la Delftana portreto-piktisto Michiel van Mierevelt, qua ipsa esis studento di Anthonie van Blocklandt.
Il studio-voyajis ad Italia, ube il recevis multa komisi por portreti. Retroveninte en Utrecht il divenis en 1596 membro di la selifisti-gildo, ed en 1611 il esis un ek la fondinti di la nova piktisti-gildo, di qua il divenis la unesma gildestro.
Moreelse esis multe-demandata portreto-piktisto e recevis komisi de la tota republiko. Lua maxim olda datizita verko esas de 1606. Il piktis ultre portreti anke historiala pikturi ye stilo manierista, e dum la 1620a yari il facis pikturi di pastoruli e pastorini. Il apartenis la sama generaciono kam Abraham Bloemaert e Joachim Wtewael, e same quale la lasta il pleis importanta rolo en la publika vivo di sua urbo. En 1618, kande la kontre-remonstranti guverneskis en Utrecht, il divenis konsilisto.
Moreelse anke laboris kom arkitekto, e desegnis en Utrecht la Catharijnepoort (1626, demolisita 1850) e forsan anke la ankore existanta Grote Vleeshuis che la Voorstraat (1637). Il docis che la Utrecht Art-Akademio, e havis multa studenti, di qui la maxim konocata esis Dirck van Baburen. Ye 19ma marto 1638 Moreelse esis enterigata en la Buurkerk.
La urbestro di Utrecht, Hendrick Moreelse esis filiulo di Paulus Moreelse.