Plebicito

De Wikipedio
(Ridirektita de Referovoto)

Plebicito o referovoto esas direta ed universala votado kande omni ek ula elekteraro kunvokesas por votar pri specifika propozuro. Ula plebicito povas facesar regionale o nacionale, e povas rezultar en l'adopto (o refuzo) di nova agado-formo, nova lego o nova legaro, inkluzite nova konstituco.

Referovoto e plebicito[redaktar | redaktar fonto]

Kelka landi distingas la termini plebicito de referovoto,[1] exemple:

  • En la Republiko Irlando la vorto plebicito referas a populala votado pri adopto o refuzo di nova konstituco, kontre ke sequanta modifikuri en la konstituco aprobesas dal populo per referovoto.
  • En Australia, referovoto uzesas por aprobar o refuzar modifikuri en la konstituco, kontre ke plebicito uzesas por aprobar o refuzar legi qui ne modifikas la konstituco.[2]
  • En Brazilia, la vorto plebicito uzesas kande la populo kunvokesas por decidar pri ula propozajo ante lua adopto, kontre ke referovoto uzesas kande la populo kunvokesas por decidar pos l'aprobo di la propozajo.

Referovoto pri nedependo[redaktar | redaktar fonto]

En kelka teritorii povas eventar referovoti/plebiciti pri sive nedependanteskar, sive durar parto de altra lando. Ca plebiciti povas havar legala aprobo de la lando qua kontrolas ca teritorio, exemple la plebicito di 1999 pri la nedependo di Estal Timor e la plebicito dil yaro 2011 pri la nedependo di Sud-Sudan, amba favoroza a la nedependo-tezo, o la plebicito dil yaro 2014 pri la nedependo di Skotia, refuzita da 55,03% ek la votinti. Altri povas judikesar kom nelegala, exemple la plebicito pri la nedependo di Katalunia en 2017, aprobita da 92,01% ek la votinti, ma judikita kom nelegala dal Hispana guvernerio.

Referi[redaktar | redaktar fonto]

  1. Definition of Plebiscite - Publikigita da Oxforddictionaries.com. Idiomo: Angla.
  2. Plebiscite or Referendum - What's the Difference - Publikigita da ABC. Idiomo: Angla.