Sanremo

De Wikipedio
Irez ad: pilotado, serchez
Sanremo
San Remo Harbour in May 2008.JPG
La portuo e l'urbo di San Remo.
Lando: Flag of Italy.svg Italia
Regiono: Liguria
Informo:
Latitudo: 43°49′17.09″N
Longitudo: 7°47′11.62″E
Altitudo: 15 m
Surfaco: 54,87 km²
Habitanti: 57 120 (2006)
Denseso di habitantaro: 1 041 hab./km²
Horala zono: UTC+1
Mapo:
Mapo di Sanremo

Sanremo o San Remo esas urbo an la Mediteranea marbordo di westa Liguria en nordwesta Italia.  Fondita dum la Romana epoko, ol havas habitantaro de 57.000, e konocesas kom turisto-loko an la Italiana Riviera.  Ol esas hosto di multa kulturala eventi, quala la Muziko-Festivalo di Sanremo e la Milan–San Remo biciklo-konkurso.

La nomo dil urbo esas fonetikala kontrakturo di Sant'Eremo di San Romolo, quo referas Romulus di Genoa, la sucedanto di Syrus di Genoa.  Ofte asertesas en moderna folkloro ke Sanremo esas tradukuro di "Saint Remus", mortinta santo.  En la Liguriana, lua nomo esas San Rœmu.  La espelo San Remo esas sur omna anciena mapi di Liguria, la anciena Republiko di Genoa, Italia dum la Mezepoko, la Rejio di Sardinia, e la Rejio di Italia.  Ol uzesis en 1924 en oficala dokumenti sub Mussolini.  Ica formo dil nomo aparas ankore sur ula strado-signi e, rare, en neoficala turist-informo.

La Mediteranea klimato di Sanremo ed atraktiva marbordala loko an la Italiana Riviera popularigas ol kom turisto-loko.  Ultre turismo, la urbo esas aktiva en produkto di oliv-oleo, kun protektata regionala "indiko di origino" (D.O.P., Denominazione di Origine Protetta).  Ol esas un ek la agrikultivala vari en westa Liguria ed aparte en la provinco Imperia.  Sanremo konocesas kom la Urbo di Flori (la Città dei Fiori), altra importanta elemento dil ekonomio dil urbo.  La proxima urbi Arma di TaggiaBordighera ed Ospedaletti anke kultivas flori por la internaciona floro-merkato di Sanremo.

La Municipal Kazino, konstruktita en 1905, esas exemplo di Art Nouveau.  La Ariston-Teatro ofras yarala serio de koncerti, operi e teatraji.  La Simfonio-Orkestro esas un ek la dekedu tala orkestri agnoskata dal stato di Italia; ol pleas 120 koncerti tra la yaro, grandaparte en la Opero-Teatro dil Municipal Kazino.

La Ariston-Teatro esas hosto dil celebrata yarala Muziko-Festivalo di Sanremo, tre populara kanson-konkurso qua eventas en la urbo depos 1951.  Ica festivalo inspiris la Eurovision Kansono-Konkurso, quo komencis en 1956, e dum yari la Sanremo-festivalo selektis la italiana konkurencanti.  La internacione remarkinda kansono Nel blu dipinto di blu, anke konocata kom Volare, esis unesmafoye pleata che ca festivalo da Domenico Modugno en 1958.  La festivalo esas tante populara che italiani ke ol ofte referesas simple kom "Il Festival" (La Festivalo).  Altra eventi inkluzas la Tenco-Premio (autuno), kanson-konkurso por autori dedikita al memoro di Luigi Tenco; la Flori-Parado en januaro/februaro; e la somerala Internaciona Pirotekniko-Konkurso Ferragosto en la duesma semano di agosto.

Sanremo esas la fineyo dil klasika Milan–San Remo biciclo-konkurso.  Ol egardesas kom "monumento" - un ek la kin maxim importanta un-dia konkursi dil biciklo-sezono.  Milan–San Remo tradicionale eventas en marto ed esas un ek la unesma granda eventi dil biciklo-sezono.  Ye longeso 298 kilometri, ol esas la maxim longa profesionala un-dia konkurso en biciklo-sporto, pro quo ol havas unika karaktero.