Shablono:Eventi/21 di septembro

La Luna 16

• 1217. Lembitu, Estoniana militala chefo, mortis en la batalio di la Dio di Santa Matthaeus, proxim Viljandi en nuna Estonia. Ilua armeo, cirkume 6000 Estoniani kunvokita de plura landi por opozar la Frati di la Espado, esis vinkata. La Frati di la Espado esis Germana militala ordeno kreita da la episkopo di Riga en 1202, e sancionita da Papo Innocentius 3ma en 1204, por konvertar la habitanti ye la komercala voyi este de la Gulfo di Riga. La unesma konocata menciono di Lembitu esas di militala entraprezo en 1211. En 1215 la fortifikajo di Lembitu ye Lehola, proxim la nuna urbo Suure-Jaani en Estonia, esis prenata da la Frati di la Espado, e Lembitu kaptesis; il esis liberigata en 1217.

• 1872. Exploristo Peter Egerton-Waburton (1813-1889) departis de Adelaide, kun sis altra homuli e 17 kameli, vers la mezo di Australia; la skopo esis trovar voyo a Perth ye la westo e survoye trovar la qualeso di la tereno. Li atingis Alice Springs frue en 1873 e komencis voyajar vers la westo ye 15 di aprilo 1873. Li sufris pro granda varmeso kun nemulta aquo; li travivis per ocidar kameli por lia karno. Li esis la unesma Europani qui transiris la Granda Sabloza Dezerto. Li arivis ye la fluvio Oakover, cirkume 1200 km norde de Perth, Warburton preske mortante e ligate adsur un de la du restanta kameli. Omni posvivis; segun Waburton, li posvivis pro la savo di la indijena membro di la expediciono.

• 1970. La kosmonavo Luna 16 lansis su de la surfaco de la luno, por retrovoyajar a Tero kun specimeno di sulo. Ca projeto di USSR esis la unesma sucesoza esforco, pos kin nesucesoza esforci, automate querar sulo-specimeno de la luno. Luna16 lansesis de Tero ye 12 di septembro ed atingis orbito cirkum la luno ye 17 di septembro. Sis minuti pos ke ol komencis decenso ye 20 di septembro, ol atingis la surfaco. Borilo penetris til 35 mm sub la surfaco, e specimeno esis prenata e pozata en la kosmonavo. La vehilo kun specimeno atingis Tero, ye Kazakhstan, per parafalo dum la finala decenso, ye 24 di septembro.