Sophie Rostopchine, komtino de Ségur

De Wikipedio
Sophie Rostopchine, komtino de Ségur
Profesiono: skriptisto
Lando: Francia
Naskodato: 1 di agosto 1799, 19 di julio 1799
Nasko-loko: Sankt-Peterburg, Rusa imperio
Mortodato: 9 di februaro 1874
Morto-loko: Paris, Francia

Sophie Rostopchine, komtino de Ségur (1ma di agosto 1799 til la 9ma di februaro 1874), esis Franciana romanisto por infantaro naskinta en Rusa imperio.

Elua familio esis di origino Mongola. Dum elua infanteso, el habitis Voronovo, proxim Moskva, ed edukesis quale la Rusa aristokrataro. El divenis poligloto, e dum lua adulteso el parolis kin idiomi. Sophie traktesis male da elua matro, qua punisis el kruele, e shamigis el publike.

Elua patro, Fiodor Rostopchine, esis lietnant-generalo, e pose ministro pri exterlandal aferi di Rusia. En 1812, il esis guberniestro di Moskva dum l'invado da Grande Armée. Il organizis granda incendio en la urbo, qua koaktis Napoléon la 1ma facar retreto, qua divenis dizastroza. Quankam ca projeto esis sucesoza, la destrukto di domegi produktis revolto dil aristrokrataro e komercisti, e Fiodor Rostopchine, desnobligita dal caro, en 1814 preferis exilar su en Polonia, pose en Germania ed Italia, e fine en Francia, en 1817. En omna ek ca landi ilu traktesis kom heroo e salvero di la monarkio.

En Paris, Sophie konocis Eugène de Ségur, e mariajis lu ye la 14ma di julio 1819. Ye la sequanta yaro, elua genitori retroiris a Rusia. Elua mariajo komence esis felica, ma pose elua spozo, sen laboro e sen pekunio, trahizis el multafoye. Ilu vivis sen laboro e kun poka pekunio til 1830, kande ilu nominesis "pero" (reprezentanto di la judiciokorto) di Francia. Ilu rare vizitis Sophie, tamen la paro havis 8 filii.

Sophie skribis sua unesma libro evante plu kam 50 yari. La libro esis morala rakonti, skribita por elua nepoti. Kelka historiisti dicas ke Eugène de Ségur konocis publicisto Louis Hachette, qua lore serchis skriptisti di libri por infanti, e parolis pri la rakonti skribita da lua spozo. En 1866 el eniris la Triesma Ordeno di Santa Franciskus, tamen el duris skribar libri. Pos ke elua spozo mortis en 1872, el mustis vendar lia domo. El mortis en 1874.