Zandvoort

De Wikipedio
Salti al navigilo Irez a serchilo
Plajo en Zandvoort

Zandvoort esas municipo en la provinco Norda-Holando, Nederlando.

Ol esas un ek la importanta plajo-vakanceyi di Nederlando; ol havas longa sabloza plajo, bordizita da litorala duni.  Ol esas anke la hemo dil maxim importanta automobilo-lico di Nederlando, Circuit Zandvoort.

Esas nudista plajo situita cirkume 2 km sude, kun 6 kafeerii o restorerii. La municipo Zandvoort konsistas ek la komunesi Bentveld e Zandvoort; ol havis habitantaro de 16.954 en 2017.

Historio[redaktar | redaktar fonto]

On savas ke Zandvoort existis en 1100, lore Sandevoerde (kombinuro de "sand", sablo e "voorde", vadeyo).  Til 1722 l'areo regnesis da la Siniori di Van Brederode.  La vilajo dependis de peskado dum multa yarcenti til la 19ma yarcento kande ol komencis transformar su aden litorala vakanceyo, segun la maniero di simila urbi en Britania.

En 1828 l'unesma vakanceyo inauguresis.  Pose multa notinda personi kustumis vizitar Zandvoort, inkluze Elisabeth di Bavaria en 1884 e 1885.  Meze dil sama yarcento, on komencis kultivar terpomi en la duni.

En 1881 la fervoyo-staciono proxim la marbordo apertesis, e pose tram-konekto kun Haarlem en 1899, qua multe augmentis plajo-turismo.

Transporto[redaktar | redaktar fonto]

Zandvoort havas fervoyo-staciono, kun servi dufoye dum horo a Haarlem ed Amsterdam, kun extra servi de Haarlem dum la somero.  La staciono nomesas Zandvoort aan Zee.