Boris Akunin

De Wikipedio
Irez ad: pilotado, serchez
Boris Akunin
Boris Akunin 2012.jpg
Profesiono: autoro
Lando: Flag of Russia.svg Rusia
Nasko-dio: 20 di mayo 1956
Nasko-loko: Zestafoni, Gruzia

Boris Akunin esas la pseudonimo di l'autoro, studiisto pri literaturo e tradukisto Grigori Shalvovich Chhartishvili. Sub la Japona-origine pseudonimo, qua signifikas proxime ”proskripito”, Chhartishvili publikigas libri pri la detektivo Erast Fandorin.

Grigori Shalvovich Chhartishvili naskis en Gruzia ye 20 di mayo 1956. Lua patro esis oficiro, matro docisto pri la Rusiana linguo e literaturo.

De pos la evo di du yari Chhartishvili vivas en Moskva. Il esas doktoro de la historiala-linguistikala fako di la instituto pri la Aziala ed Afrikala landi di la universitato di Moskva. Ilu tradukabas literaturo de la Japoniana e la Angliana (Yukio Mishima, Kendzi Maruyama, Jasushi Inoue, Masahiko Shimada, Kobo Abe, Sinjichi Hoshi, Takeshi Kaiko, Coraghessan Boyle, Malcolm Bradbury, Peter Ustinov, e.c.).

Dum la yari 1999 e 2000 il esis la duesma chef-redaktoro di la jurnalo Inostrannaya literatura (Exterlandala literaturo), la chef-redaktoro di la 20-tomala antologio pri la Japoniala literaturo, la prezidero di la redakterio di la granda projeto di Pushkinskaya biblioteka (Pushkin-biblioteko).

Ye aprilo 1998 publikigesis l'unesma libro di Akunin, romano Azazel’, pos to Tureckiy gambit (Turkiala gambito). Ye 1999 ilu skribis la verko Pisatel’ i samoubiystvo (La autoro e suocido) e literaturo-revuanta artikli. La romano- e rakontoserio Priklyucheniya Erasta Fandorina (La aventuri di Erast Fandorin) kunportis famozeso. Ultre ca libri Akunin skribis la serii Priklyucheniya sestry Pelagii (La aventuri di fratino Pelagia), Priklyucheniya magistra (La aventuri di la doktoro) e Zhanry (La jenri). Dum recenta yari Akunin skribabas anke multa teatraji.