1793. La Requiem da Wolfgang Amadeus Mozart esis pleata ye benefico-koncerto por Constanze Mozart, vidvino di la kompozisto. Mozart esis komisata da komto Franz Walsegg-Stuppach skribar ca verko; agento di la komto anonime vizitis Mozart por donar la komiso. La verko esis ne kompleta ye la morto di Mozart en decembro 1791, e Franz Xaver Süssmayr, studento di Mozart ed ilua sekretario dum la last yaro, aceptis facar la kompletigo. Kelka movimenti esis preske kompleta; altra movimenti postulis multa kompozado da Süssmayr.
1843. En Dresden, la opero La Fluganta Holandano, da Richard Wagner, esis unesmafoye pleata. Ol esas la maxim frua de ilua operi qua havas granda reputeso. En mayo 1840 il komencis skisar la rakonto, fondita sur rakonto da Heinrich Heine, ed en novembro 1841 la opero esis kompleta. En la opero, la kapitano di navo esas kondamnita eterne seglirar, til ke il trovos homino qua fidele amorus il til morto. Pos sep-yara periodo il darfas irar sur tero por serchar tala homino.
1959. Luna 1, kosmosondilo di USSR, esis lansata. Ol esis la unesma sondilo qua eskapis de la graviteso di Tero. La intenco esis ke ol frapus la luno; tamen, pro eroro di kombusto-duro dum la lanso, ol faliis facar to. (To facesis plu tarde da Luna 2.) Pos 34 hori di flugo, ol preterpasis la luno ye disto 6000 km. Ol portis diversa mezurili, por mezurar radiado, magnetala feldo ed altraji. Nuntempe olua orbito, cirkum la suno, jacas inter Tero e Marso.
