1787. En Praha, la opero Don Giovanni, da Wolfgang Amadeus Mozart, esis unesmafoye pleata. Ol esis tre bone recevata da la audantaro. La opero esis komisata pos la sucesoza vizito di Mozart a Praha en januaro e februaro 1787. Mozart kompletigis la kompozado di Don Giovanni ye 28 di oktobro, ed il direktis la pleado. En Wien la opera esis unesmafoye vidita ye 7 di mayo 1788, anke direktata da la kompozisto.
1959. La karaktero Astérix unesmafoye aparis, en la kartuno-kayero Pilote. La rakonto, pri Astérix, la Gala heroulo rezistanta la Romani en okupita Galia, esis skribata da René Goscinny ed ilustrata da Albert Uderzo. En 1961 aparis Astérix le Gaulois, la unesma de duranta serio de libri pri Astérix. Pos la morto di Goscinny en 1977, Uderzo anke skribis la rakonti; en 2009 il vendis la yuri a la kompanio Hachette.
1991. Du monati pos ke ol eniris la asteroido-zono, la kosmonavo Galileo atingis maxim proximeso, cirkume 1600 km, a la asteroido 951 Gaspra. Lo esis la unesma renkontro kun asteroido di irga kosmosondilo. 951 Gaspra havis dimensioni cirkume 19 per 12 per 11 km, e havis multa krateri. Ye 28 di agosto 1993, Galileo renkontris plusa asteroido, 243 Ida. Galileo departabis de Tero ye 18 di oktobro 1989; en julio 1995 ol atingis Jupitero.
