Antwerpen

Antwerpen

Antwerpen kun lua katedralo e fluvio Scheldt.

Standardo	Blazono
Lando:	Belgia
Regiono:	Provinco Antwerpen
Informo:
Latitudo:	51°13'0" N
Longitudo:	04°24'0" E
Altitudo:	8 m
Surfaco:	208,22 km²
Habitanti:	565 039 (2024)
Denseso di habitantaro:	2700 hab./km²
Disto de Bruxel:	45^[1] km
Horala zono:	UTC+1 (UTC+2 dum somero)
Urbestro:	Els van Doesburg (N-VA)
Mapo:

Oficala retosituo:
http://www.antwerpen.be

Antwerpen (France: Anvers, Angle:Antwerp, Nederlandane Antwerpen) esas la 2ma maxim populoza urbo di Belgia e chef-urbo di la provinco samnoma. Segun statistiki de 2024, ol havis 565 039 habitanti. Lua tota surfaco esas 208,22 km². Lua metropolala regiono havis 1,23 milion habitanti ye la sam yaro.

Fluvio Scheldt trairas la urbo e ligesas a Norda maro per l'estuario Westerschelde. Antwerpen distas cirkume 40 km per streta lineo de Bruxel, e 15 km de la frontiero kun Nederlando. Lua portuo esas un ek la maxim granda de la mondo, e la 2ma maxim granda de Europa, dop Rotterdam. Ol esas importanta centro mondala por la komerco di diamanti.

Dum la historio, l'urbo sempre esabas importanta centro ekonomiala e kulturala. Lua Borso, origine konstruktita en 1531, esas la maxim anciena de la mondo. En 1920 eventis l'Olimpiala Ludi en la urbo.

Lua habitantaro esas diversa, inkluzanta cirkume 180 nacionesi. En 2019, plu kam 50% de lua habitantaro havis adminime 1 genitoro qua ne esis naskinta en Belgia. Existas importanta komunitato di judi en la urbo.

Geografio

Distanta 88 km de la loko ube fluvio Scheldt debushas an Norda maro, la reliefo di Antwerpen esas plana, sen monti o mem kolini importanta. Lua mezavalora altitudo esas 8 metri super la marala nivelo.

La klimato dil urbo esas oceanala (Cfb segun la klimatala klasifikuro da Köppen), kun koldeta vintri, varma someri e frequa pluvo dum la tota yaro. Pro influo de la Fluo di Gulfo, lua klimato esas milda dum la tota yaro. La mezavalora temperaturo en julio (somero) esas 18,9°C, kontre ke la mezavalora temperaturo en januaro (vintro) esas 4°C.

La mezavalora yarala pluvo-quanto esas 852,9 mm, e la maxim pluvoza monato esas decembro, kun mezavalore 90,9 mm. Omnayare, l'urbo recevas mezavalore 1743 hori di sunolumo. Mayo til agosto esas la maxim sunoza epoko en la urbo.