Batalii di Lexington e Concord

De Wikipedio
Irez ad: pilotado, serchez
Graburo di la Batalio di Lexington

La Batalii di Lexington e Concord esis la unesma militala kombati dil Usana Nedependo-Milito.

La batalii eventis ye 19ma aprilo 1775 en Komtio MiddlesexProvinco di Massachusetts-Bayo, en la urbi LexingtonConcordLincoln, Menotomy (nuna Arlington) e Cambridge.  Li signalis la komenco di armizita konflikto inter la Rejio di Granda Britania ed olua dek-e-tri kolonii en Amerika.

En tarda 1774, koloniala dukteri adoptis le Suffolk Resolves reziste la alteri di la koloniala guvernerio di Massachusetts da la britana parlamento pos la Teo-Festo di Boston.  La kolonial asemblo respondis per formacar Patriota provizora guvernerio, la Massachusetts Provincial Congress, ed instigar lokala milici exercar por posibla konflikto.  La koloniala guvernerio efektive regnis la kolonio exter britana Boston.  Responde, la britana guvernerio en februaro 1775 deklaris ke Massachusetts esis en stando di revolto.

Cirkume 700 britana soldati en Boston, sub Lietnanto-Kolonelo Francis Smith, sekrete komandesis kaptar e destruktar koloniala milito-provizaji, raportite konservita da la Massachusetts-milico en Concord.  Per efikiva inteligenteso-glino, Patriota dukteri saveskis semani ante la expediciono ke lia provizaji vizesis, e movis la granda parto ad altra loki.

Dum la nokto ante la batalio, averto pri la britana expediciono rapide sendesis de Boston a milici en la areo da plura kavalkeri, inkluzanta Paul Revere, kun informo pri britana projeti.  La arivo-maniero dil armeo signalesis de la kirko Old North Church en Boston a Charleston per lanterni por komunikar "un se per tero, du se per maro".

Paul Revere

La unesma pafi eventis ye sunlevo en Lexington.  Ok milicani ocidesis, inkluzanta Sublietnanto Robert Munroe.  La britani sufris nur un vundito.  La milico esis tro poka e retretis, la britani iris a Concord, ube li dividis su aden kompanii por serchar la provizaji.  Ye la ponto North Bridge en Concord, cirkume 400 milicani lukteskis kontre 100 britana soldati di tri kompanii ye 11.00 matine, rezultinta en vunditi ambalatere.  La tro poka soldati retretis de la ponto e riunionis su kun la cetera britana armeo en Concord.

La britana armeo komencis sua retro-marcho a Boston pos kompletigar sua sercho a provizaji, e plu multa milicani duris arivar de vicina urbi.  Pafado ri-eruptis inter la du lateri e duris tra la jorno dum ke la britani retromarchis vers Boston.

Lor retroveno a Lexington, l'expedicino di Lt. Kol. Smith salvesis dal trupi di Brigadiero-Generalo Hugh Percy.  La kombinita armeo de 1700 retromarchis a Boston kom taktikala retreto e fine atingis sekura Charlestown.  La milici lore blokusis la streta ter-aceseyi a Charlestown e Boston, startinta la Siejo di Boston.

Ralph Waldo Emerson deskriptis la unesma pafo da la Patrioti ye North Bridge en sua "Concord Hymn" kom la "pafo audita cirkum la mondo".

Pre-historio[redaktar | redaktar fonto]

Lietnanto-Kolonelo Francis Smith

L'infantrio dil britana armeo nomizesis "redcoats" e kelkafoye "diabli" da la kolonani.  Li okupabis Boston depos 1768 ed augmentesabis per mar-armeani pro La Netolerebla Akti, legifita da la britana parlamento por punisar la Provinco di Massachusetts-Bayo pro la Tea-Festo di Boston ed altra agi defianta.

Generalo Thomas Gage esis la militala guvernero di Massachusetts e chef-komandero di la 3000 britana soldati en Boston.  Il nule regnis Massachusetts exter Boston, tamen, ube la Akti tensigis relati inter la Patriota Whig-majoritato e la por-britana Tory-minoritato.  La projeto da Gage esis evitar konflikto per furtar militala provizaji de Whig-milici per mikra, sekreta e rapida stroki.  Ica sercho a provizaji duktis ad un britana suceso e plura Patriota sucesi en serio de preske sensanga konflikti konocita kom le Powder Alarms.

Gage egardis su amiko di libereso e probis separar sua devi kom guvernero dil kolonio e generalo di okupanta armeo.  Edmund Burke deskriptis la relato di Gage kun Massachusetts per dicar en Parlamento, "Anglo esas la minim apta persono sur Tero argumentar altra anglo aden sklaveso."

La koloniisti formacis milici depos la komenco di koloniigo skope defenso kontre ataki dal Indijeni.  Ica milici anke luktis dum la Franca ed Indijena Milito inter 1754 e 1763 kande li luktis kun britana soldati.  Segun la legi di omna kolonio di Nova Anglia, omna urbi obligesis formacar milico-kompanii ek viri evanta 16 yari o plu olda, e certigar ke la membri armizesis.