Carl Reinecke
Carl Heinrich Carsten Reinecke (n. 23 di junio 1824, m. 10 di marto 1910) esis Germaniana pianisto e kompozisto.
Il naskis en Altona, nuntempe parto di Hamburg, tatempe en Dania. Il unesmafoye koncertis evante dek-e-du yari, e facis koncerto-turi en 1843 en Dania e Suedia. Il pose rezidis en Leipzig, studiante kun Mendelssohn, Schumann e Liszt. En 1851 il divenis profesoro ye la Konservatorio di Köln; en 1860 il divenis profesoro di piano e kompozado ye la Konservatorio di Leipzig, e til 1895 esis direktanto di la Gewandhausorchester Leipzig. Il retretis de la konservatorio en 1902. Il kompozis quar piano-koncerto-peci, tri simfonii e multa altraji. Il mortis en Leipzig en 1910.