Currywurst
Currywurst esas disho de germana origino qua konsistas ek vaporo-koquita, pose fritita porko-sociso (Germane: Bratwurst) normale tranchita aden peci e spicizita per kerio-kechupo, sauco fondita sur spicoza kechupo o tomato-pasto, ipsa kovrita per kerio-pulvero, o pre-facita kechupo spicizita per kerio ed altra spici.
La disho ofte servesas kun fritita terpomi.
On kredas ke currywurst inventesis da Herta Heuwer en Berlin en 1949, elqua obtenis kechupo (o posible Worcestershire-sauco) e kerio-pulvero de britaniana soldati en Germania. El mixis ta ingredienti kun altra spici e varsis oli sur grilita porko-sociso. Heuwer vendeskis la chipa ma sacianta repasteto che strad-echopo en la distrikto Charlottenburg di Berlin, ube ol divenis populara che konstrukto-laboristi qui rikonstruktis la devastita urbo. El patentizis la sauco sub la nomo "Chillup" en 1951. Maxim populare l'echopo vendis 10.000 repasteti singlasemane. El pose apertis mikra restorerio qua operacis til 1974. Hodie, currywurst ofte vendesas kom forpreno-disho, che Schnellimbisse (repasteto-echopi), che dineerii, sur puero-menui en restorerii, or kom strado-disho e normale servata kun fritita terpomi o semli (Brötchen). Ol esas populara omnaloke en Germania ma aparte en la metropolala arei di Berlin, Hamburg e la Ruhr-regiono.
Konsiderinda vario, e segun tipo de sociso uzata e segun ingredienti dil sauco, esas konstatebla inter ta arei. Frequa varii inkluzas adjunto di papriko o hachita onyoni; halal-echopi ofte preparas currywurst per bovkarno-sociso. Ofte currywurst vendesas che echopi, kelkafoye per specala mashino por tranchar ol aden peci, e servata sur papera plado kun ligna o plastika forketo. Ol anke vendesas kom supermerkato-produkturo por preparesar heme.
La muzeo Deutsches Currywurst Museum apertesis en Berlin ye 15 agosto 2009, celebrinte la 60ma aniversario di olua kreeso. L'administristo Martin Loewer dicis "Nul altra nacionala germana disho inspiras tante multa historio e havas tante multa konocata fanatiki". La muzeo atraktas cirkume 350.000 vizitanti singlayare.
La muzeo evaluas ke 800 milion "currywurst" manjesas singlayare en Germania, ek qui 70 milion en Berlin. La Volkswagen-fabrikerio en Wolfsburg jeras sua propra bucherio qua produktas c. 7 millon "currywurst" singlayare e servas multa direte a sua employati.