Groningen (provinco)

De Wikipedio
Salti al navigilo Irez a serchilo
Groningen
Provinco di Nederlando
Flag Groningen.svg Groningen provincie wapen.svg
Chef-urbo Groningen
Maxim granda urbo Groningen
Groningen in the Netherlands.svg
Surfaco 2 960 km²
Habitanti
Denseso di habitantaro
582 649 (2015)
250 hab./km²
Guberniestro René Paas (CDA)
Horala zono UTC+1
(UTC+2 dum la somero)

Groningen esas provinco en nord-esto di Nederlando. Olua chef-urbo e maxim important urbo esas Groningen. Ol bordizas Germania este e la Nederlandana provinci Drenthe sude e Frizia weste ed esas la maxim nord-esta provinco dil lando.

La provincala habitantaro esis 582 649 personi ye augusto 2015. La triimo de li habitas en l'urbo Groningen. Lu esas skarse habitata provinco.

La regiono dil nuna Groningen esis olim domeno di Friziani. Dum la alta mezepoko l'urbo Groningen, en qua precipue Saxoniani habitis, aquiris multa yuri e privileji e dominacis la ankore libera Friziana landi, la du esante parto dil Santa Romana Imperio. To kreis duronta konflikto inter l'urbo Saxonian e la Friziana cirkumaji, reflektita en la anciena nomo Stad en Ommelanden (Urbo e Cirkuma Landi). Nur en 1536 la regiono divenis un unajo politikal. Lu divenis membro dil Nederlandana Republiko ye 1594, pos ke la Nederlandana armeo, la Friziani dil Ommelanden e l'Angliani konquestabis l'urbo Groningen. La regiono divenis departmento dum la Franca republikana periodo (kun multa departmentala chanji) e provinco dil Nederlandana rejio en 1814.

Importanta aktiveso ekonomial esas agrikulturo e delor 1959 Groningen havas ekonomiale tre importanta gas-explotado. To efektigis diversa sismi dum recenta yari.

La dialekto dil provinco esas formo di Saxonana. La Westa Friziana esas la linguo en mikra westa parto dil provinco.