Jan Asselijn

Jan Asselijn (Dieppe, c. 1610 - Amsterdam, c. 1ma oktobro 1652) esis nederlandana piktisto e desegnisto di la Nederlandana Ora Epoko qua apartenis la Holandana Skolo.

Il esis la plu olda fratulo di Thomas Asselijn, dramatisto.

Biografio

Asselijn naskis en Dieppe a franca Huguenot-familio kom Jean Asselin. Il docesis da Esaias van de Velde (1587-1630), ed ecelis aparte en peizaji ed animalo-pikto, ma lua historiala verki e batalio-pikturi anke admiresis. il voyajis en Francia ed Italia, e muldis sua stilo segun Bamboccio (Pieter van Laer), altra membro di le Bentvueghels.

Nicolaes de Helt Stockade ed Asselijn mariajesis kun du fratini en Lyon en 1645, amba esis filiini di Houwaart Koorman di Antwerpen. Segun Houbraken, il audis ta naraco de Abraham Genoels, qua suafoye audis ol de Laurens Frank, artisto qua lojis che le Koorman kun Artus Quellinus en Lyon tatempe. Lia mariaji adportis Asselijn e Helt Stockade retro a Nederlando pos lia voyaji. Asselijn havis velkinta manuo e mikra staturo, pro to il havis la nomo en Francia petit Jean Hollandois, e la nomo Krabbetje (pinceto) che le Bentvueghels.

Il semble amikeskis kun Rembrandt. En la aquafortajo quan Rembrandt facis di lu, Asselijn semble stacas avan tresto. Lua manui ne montresas. Frederick de Moucheron, altra italianatra peizajo-piktisto, esis lua studento.

Il esis un ek la unesma nederlandana piktisti qui enduktis fresha e klara maniero di peizajo-pikto segun la stilo di Claude Lorraine, e lua exemplo quik imitesis da altra artisti. Lua pikturi alte estimesis en Amsterdam, e plura de li esas en la muzei di ta urbo. Duadek-e-quar, piktita en Italia, esis grabita.

Un ek lua pikturi, De bedreigde zwaan (la minacata cigno), qua montras cigno qua atakeme defensas sua nesto, divenis simbolo di nederlandana nacionala rezisto, ma on ne savas kad Asselijn intencis lo. Partikulare, ol interpretesis kom imajo di Johan de Witt. Plura enskriburi adjuntesis da posa proprietanti dil pikturo, inluzanta "Holland" sur un ek la ovi, ed "Enemiko di la stato" apud la hundo qua minacas la nesto. Ula parti del pikturo esas min realista kam la cigno, quala la base-pendanta nubi, la hundo e la plat-aspektanta ovi. La pikturo devenas de la yari 1640ma. Ol egardesas kom la maxim famoza verko da Asselijn ed esis la unesma aquirajo di la Rijksmuseum en Amsterdam.