Kingston
| Kingston | ||
 | ||
| Panoramo pri Kingston. | ||
| Lando: |  Jamaika | |
Informo: | ||
| Latitudo: | 17°58′17″N | |
| Longitudo: | 76°47′35″W | |
| Altitudo: | 17[1] m | |
| Surfaco: | 25 km² | |
| Habitanti: | 662 435 (2011) | |
| Denseso di habitantaro: | 1346.1 hab./km² | |
| Horala zono: | UTC-5 | |
| Urbestro: | Andrew Swaby | |
Mapo: | ||
 | ||
Oficala retosituo: | ||
| ksamc | ||
Kingston esas chef-urbo e maxim populoza urbo di Jamaika, jacanta an la sud-estala rivo di la lando. Ol konstruktesis apud naturala portuo, protektita da naturala barilo ek sablo, nomizita "Palisadoes". Segun la demografiala kontado di 2011, l'urbo havis 662 435 habitanti.[2] Lua tota surfaco esas 480 km². Lua metropolala regiono havis 1 190 000 habitanti ye la sam yaro.
Kingston fondesis en 1692 dal Britaniani e nomizesis honore la rejulo William la 3ma, poke pos la ter-tremo qua destruktis Port Royal. En 1907, Kingston frapesis da ter-tremo qua produktis 800 morti.
L'urbo gastigas la kampuso Mona, dil "Universitato di Westal Indii" (Angle: University of the West Indies), fondita en 1948.
L'aeroportuo internaciona, distanta 19 kilometri de lua centro, esas la 2ma maxim uzata aeroportuo di la lando, dop l'aeroportuo di Montego Bay.
Geografio
[redaktar | redaktar fonto]
La reliefo di Kingston esas plana sude, proxim la litoro, e kolinoza norde. L'urbo cirkondesas da Blua Monti (Blue Mountains), Reda Kolini (Red Hills), Longa Monto (Long Mountain), e sude da lua naturala portuo, la 7ma maxim granda naturala portuo de la mondo. Lua mezavalora altitudo esas 17 metri super la marala nivelo[1].
La klimato dil urbo esas tropikala de savano (Aw/As segun la klimatala klasifikuro da Köppen), an la limito kun miarida klimato (Bsh). Temperaturi ne varias multe dum la tota yaro: en julio (somero) la mezavalora temperaturo esas 29,3°C, kontre ke la mezavalora temperaturo en januaro e februaro (vintro) esas 26,6°C. Dum la 21ma yarcento, Kingston subisis temperaturi tam alta kam 38.8 °C, e tam basa kam 13.4 °C. Nebulo, greluno, tondro e tornadi esas multe rara.
La pluvoza sezono iras de mayo til novembro, e koincidas kun la sezono di uragani, kontre ke la sika sezono iras de decembro til aprilo. Dum la sika sezono falas poka pluvo, ma kelkafoye kolda fronti eventas, portanta pluveti. Kingston jacas dope Blua Monti, do ol ne recevas humideso de alizei qui suflas denorde. Pro to, ol esas plu sika kam komoni Portland e Saint Mary, norde del insulo. La mezavalora yarala pluvo-quanto esas 885,2 mm, e la maxim pluvoza monato esas septembro, kun mezavalore 184,7 mm.
Referi
[redaktar | redaktar fonto]
- 1 2 https://whatismyelevation.net/countries/jamaica
- ↑ Population Usually Resident in Jamaica, by Parish: 2011 - Publikigita da Statistical Institute of Jamaica. URL vidita ye 22ma di aprilo 2023. Idiomo: Angla.