Paramaribo

De Wikipedio
Paramaribo
La strado Waterkant en Paramaribo.
Lando: Surinam
Informo:
Latitudo: 5°51'08" N
Longitudo: 55°12'14" W
Altitudo: 3 m
Surfaco: 182 km²
Habitanti: 240 924 (2012)
Denseso di habitantaro: 1300 hab./km²
Horala zono: UTC-3
Mapo di Paramaribo

Paramaribo esas la chef-urbo di Surinam. Segun demografiala kontado di 2012, ol havis 240 924 habitanti. To esas preske la duimo dil habitantaro di Surinam. Lua tota surfaco esas 182 km².

Historio[redaktar | redaktar fonto]

Mapo de 1737 pri Paramaribo.

La nomo Paramaribo posible originis de Parmirbo, indijena vilajo qua existis en la regiono. En 1613, Nederlandani Nicolaes Baliestel e Dirck Claeszoon van Sanen apertis faktorio ibe. Franci anke fondis faktorio en la regiono en 1644. Nederlandani abandonis la zono ante l'arivo dil Angli en 1650, ma rikonquestis ol en 1667, pos la duesma Angla-Nederlandana milito. Ye la sama yaro, Paramaribo divenis chef-urbo di Nederlandana kolonio Surinam.

La habitantaro dil urbo sempre esis multe diversa. Inter l'unesma Angla koloniigisti esis multa Judi, ed un ek la maxim anciena sinagogi de Amerika fondesis en Paramaribo. La habitantaro dil urbo kreskis multe pos 1873, kande ex-sklavi darfis abandonar l'anciena plantacerii di sukrokano.

Paramaribo restis chef-urbo di Surinam de la kolonial epoko tra la nedependo en 1975, til nun. Dum lua historio, multa incendii devastis ol, exemple en januaro 1821 e septembro 1832.

Geografio[redaktar | redaktar fonto]

Aeral imajo pri Paramaribo.

Paramaribo esas plana urbo, sen kolini. Jacante apud la fluvio Suriname, ol distas cirkume 15 km del Atlantiko.

La klimato dil urbo esas Equatorala (Am segun la klimatala klasifikuro da Köppen). La mezavalora temperaturo yarala varias, segun la monato, de 26°C (decembro til marto) til 28°C (septembro til oktobro).

La mezavalora yarala pluvo-quanto esas 2220 mm, e la maxim pluvoza monati esas mayo e junio, kun mezavalore 290 mm, single. Ne existas sika monati.