Rivero Tietê
Tietê esas Braziliana rivero dil stato Sao Paulo. Ol esas longa de cirkume 1 150 km.
La rivero naskas ye cirkume 22 km del litoro che municipo Salesópolis, ye altitudo di 1.120 metri super la marala nivelo. Tamen, ol fluas plu kam 1.000 km weste e pose nord-weste til debushar an fluvio Paraná. Nun, ol esas importanta por produktado di hidroelektrala energio en lua 11 aquobarili, e por riverala transporto, pro sistemi di sluzi qui posibligas la navigo de rivero Paraná til municipo Conchas, ye 155 km nord-weste di Sao Paulo.
Malgre lua ekonomiala importo, la rivero subisas intensa poluto kande ol krucumas la metropolala regiono di Sao Paulo. Tietê e lua enfluanti recevas granda quanto de domala rezidui, qui produktas intensa malodoro dum sika dii, e la granda fishi tote desaparis de ta regiono.
La polutajo fluas del metropolala regiono til proxim Salto, municipo situata ye 75 km nord-weste di Sao Paulo, ma trans Salto Tietê recevas multa enfluanti kun neta aqui. Advale dil urbo Sao Paulo, l'aquobarilo Edgard de Souza en Santana de Parnaíba retenas parto dil polutajo, qua lore sedimentifas sur la fundo (ol retenas mem la spumo di detersivi, quo produktas depresiva spektajo, kande la vento levas e portas floki ek fetida spumo del aquo-surfaco) e la rapidaji ed aquofalo inter la urbi Itu e Salto ebuliigas e rioxigenizas la riveral aquo. Konseque, vivanti - precipue granda fishi - riaparas advale di ta regiono.
Por diminutar la polutajo di Tietê e di lua enfluanti, on konstruktas granda instaluri por salubrigar l'aquo en la metropolala regiono di Sao Paulo, ma la dato por parkonstrukto dil tota sistemo ne ja esas determinita.
Altra problemo produktata da rivero Tietê esas la inundadi, qui ordinare eventas omnayare dum someri. Konseque de desordinita kresko di la metropolo, granda parto di lua valo en Sao Paulo ed en vicina urbi kovresas da betono ed asfalto, qui ne lasas la sulo absorbar pluvuro. L'aquo fluas rapide vers Tietê ed inundas tereni an lua rivi.